Azərbaycan, Bakı, 21 may /Trend/
Azərbaycan xalqının ümummilli lideri Heydər Əliyevin 90 illik yubileyi münasibətilə Misirin "Qahirə" peyk telekanalında veriliş efirə gedib.
Azərbaycanın Misirdəki səfirliyindən Trend-ə verilən məlumata görə, verilişdə ulu öndərin həyatından bəhs edən sənədli film tamaşaçıların ixtiyarına verilib və ümummilli liderin 90 illiyi münasibətilə səfirlikdə keçirilmiş tədbir barədə süjet gedib.
Həmçinin, Azərbaycanın bu ölkədəki səfiri Şahin Abdullayevin və Türkiyənin Misirdəki səfiri Hüseyn Avnı Botsalının Heydər Əliyevlə bağlı sözügedən kanala müsahibələri təqdim edilib.
Müsahibəsində Abdullayev ümummilli lider Heydər Əliyevin Azərbaycan xalqı üçün əhəmiyyətindən danışarkən Heydər Əliyevin bütünlüklə müasir Azərbaycan tarixinin əvəzolunmaz görkəmli şəxsiyyəti olduğunu vurğulayaraq, müstəqillik illərində ölkəmizin iqtisadi intibahının və sonrakı mərhələlərdə iqtisadi inkişafının məhz Heydər Əliyevin adı ilə bağlı olduğunu xüsusilə qeyd edib, Azərbaycan xalqının Heydər Əliyevin uzaqgörən siyasətinin bəhrəsini gördüyünü tamaşaçıların diqqətinə çatdırıb.
Öz növbəsində, səfir Botsalı xarizmatik və dahi şəxsiyyət olmuş Heydər Əliyevin son dərəcə təcrübəli lider olduğunu xüsusilə qeyd edərək, Heydər Əliyevin türk dünyası üçün müstəsna rolunu vurğulayıb, "bir millət, iki dövlət" prinsipinə söykənən Azərbaycan-Türkiyə əlaqələrinin, eləcə də Azərbaycanın beynəlxalq və regional əhəmiyyətini artıran neft-qaz layihələrinin memarı olduğunu önə çəkib, Heydər Əliyevin təməlini qoyduğu iqtisadi tərəqqinin hazırda Prezident İlham Əliyevin rəhbərliyi altında uğurla davam etdirildiyini söyləyib.
Ətraflı: http://www.youtube.com/watch?v=Nv41ogviG7Y&feature=em-upload_owner-smbtn