İran, Urmiya, 27 noyabr /Trend, müxbir Təmkin Cəfərov/
"Əgər müsəlmanlar arasında birlik olarsa, heç kəsin cəsarəti çatmaz ki, onlara zülm etsin". Trend xəbər verir ki, bunu İranın ali liderinin Qərbi Azərbaycan əyaləti üzrə nümayəndəsi və Urmiya şəhərinin cümə imamı Seyid Mehdi Qüreyşi Azərbaycanın işğal olunmuş Dağlıq Qarabağ regionunda ermənilər tərəfindən İslami abidələrin dağıdılması, məscidlərə hörmətsizliklə bağlı azərbaycanlı jurnalistlərin sualını cavablandırarkən deyib.
M.Qüreyşi bildirib ki, müsəlmanlar arasında ayrılıq salıblar, çox kiçik və əsassız məsələlərə görə narazılıq yaradıblar. "Əgər dünyada müsəlmanlar arasında birlik yaransa, onda nə sizin ölkədə, nə İraqda, nə Əfqanıstanda, nə Suriyada, nə Myanmarda, nə də digər müsəlman ölkələrində kimsə cəsarət edib məscidlərə, insanların evinə, abidələrə hücum edə bilər. Dünyanın hər bir yerində bir müsəlmanı incitdikdə buna müsəlmanlar etiraz edərsə, bu etirazlar həmin zülmlərin qarşısını alar. Bu məsələ Azərbaycanla bağlı da belədir. Yəni Azərbaycanla bağlı da aramızda birlik olsa məscidləri yandırmazlar, təhqir etməzlər".
Azərbaycan məscidləri haqqında nəşr olunan kitabı jurnalistlərə təqdim edən ali liderin nümayəndəsi kitabın nəfis tərtibatla hazırlandığını, orada məscidlərin sayının çox olduğunu deyib, Azərbaycanda din və dindarlığın geniş yayılmasından məmnunluğunu ifadə edib.
M.Qüreyşi deyib: "Müsəlmanların düşmənləri məlumdur və bunlar hamısı bir-biriləri ilə əlbirdirlər. Qəzzada müsəlmanları öldürürlər, onları dəstəkləyən ABŞ-dır. Digər tərəfdən, sizin məmləkətdə də işğalçıların bir-biriləri ilə əlaqələri var. Bu işğalçılar bir-birlərinə kömək edirlər. Biz deməməliyik ki, məsələn, bu, təkcə İranın problemidir. Əgər iranlılar desələr ki, bu, təkcə İranın problemidir, bu, İslamın dediyinə zidd olar. İslam deyir ki, müsəlmanların problemidir. Fərq etməz bu müsəlman sizin, bizim ölkədə, İraqda, Suriyada, Fələstində, Qəzzada olsun. Harada olursa olsun, müsəlmandır".
Cümə imamı ümid etdiyini bildirib ki, Allahın lütfü ilə həm Azərbaycanda, həm də digər İslam ölkələrində münaqişələr müsəlmanların birliyi ilə tezliklə öz həllini tapacaq.
M.Qüreyşi bildirib ki, Azərbaycan və İran arasında mədəniyyət, din baxımından bağlılıqlar və oxşarlıqlar həddindən artıq çoxdur. O, iki ölkənin münasibətlərinin inkişafında medianın önəmli rolu olduğunu vurğulayıb və deyib ki, hər iki ölkə sülh, səmimiyyət və dostluq atmosferində qonşuluq edirlər: "Bu əlaqələr həm dini, həm ictimai və mədəniyyət, iqtisadi sahələrdə artırılmalıdır. Məndə olan məlumata görə, iki ölkənin ticarət dövriyyəsinin həcmi aşağıdır. Biz bu ticarət mübadiləsinin səviyyəsini artırmalıyıq. Ticarət mübadiləsinin artırılması hər iki ölkənin xalqlarının və dövlətlərinin xeyrinədir".
M.Qüreyşi deyib ki, hazırda dünyada vəziyyət elədir ki, müsəlmanların bir-biri ilə münasibətlərini inkişaf etdirməkdən başqa çarəsi yoxdur: "Biz dünya ictimaiyyətinə İslamın məhəbbət, səmimiyyət, sülhsevər bir din olduğunu göstərməliyik".
