Azərbaycan, Bakı, 5 iyun /Trend, müxbir İlkin İzzət/
Dövlət Miqrasiya Xidmətində (DMX) Birləşmiş Millətlər Təşkilatının (BMT) qaçqınlar üzrə ali komissarının Cənubi Qafqaz üzrə regional nümayəndəsi ilə görüş olub.
DMX-dən Trend-ə verilən məlumata görə, Xidmətin rəisi, II dərəcəli dövlət miqrasiya xidməti müşaviri Firudin Nəbiyev bu gün BMT-nin qaçqınlar üzrə ali komissarının Cənubi Qafqaz üzrə regional nümayəndəsi xanım Simone Volken və BMT-nın Qaçqınlar üzrə Ali Komissarlığının (QAK) Azərbaycandakı nümayəndəliyinin rəhbəri Daq Siqurdsonla görüşüb.
I Avropa Oyunları kimi möhtəşəm bir tədbirə ev sahibliyi edən Azərbaycanın sürətli inkişafından məmnunluq ifadə olunan görüş zamanı DMX ilə BMT QAK arasında mövcud sıx əməkdaşlıqdan söhbət açılıb, bu əməkdaşlığın gələcəkdə daha da dərinləşdirilməsi istiqamətində səylərin davam etdirilməsinin zəruriliyi vurğulanıb.
Son illərdə dünyada baş verən hərbi, siyasi münaqişələr nəticəsində yaranan kütləvi qaçqın axınlarından narahatlıq ifadə olunub. Böhran şəraitində olan ölkələrə Azərbaycanın mütəmadi humanitar dəstəyinə diqqət çəkən Xidmət rəisi qeyd edib ki, Ermənistanın təcavüzü nəticəsində öz yurd-yuvalarından didərgin düşmüş 1 milyondan artıq azərbaycanlı 20 ildən çoxdur ki, qaçqın və məcburi köçkün həyatı yaşayır: "Onların sosial şəraitinin yaxşılaşdırılması ilə bağlı Prezident İlham Əliyev tərəfindən ardıcıl və əsaslı tədbirlər görülsə də, təəssüf ki, münaqişənin nizamlanması ilə bağlı məsələyə beynəlxalq ictimaiyyət tərəfindən hələ də obyektiv münasibət göstərilmir".
Xidmət rəisi bu münaqişənin və onun nəticələrinin aradan qaldırılmasında BMT-nin fəaliyyətinin böyük əhəmiyyət kəsb etdiyini qonağın diqqətinə çatdırıb.
Görüşdə miqrasiya qanunvericiliyinə edilmiş son dəyişikliklər barədə məlumat verilib, bu yeniliklərin qaçqınların, eləcə də bütün miqrantların hüquqlarının müdafiəsinin gücləndirilməsinə xidmət etdiyi qeyd olunub. Həmçinin vətəndaşsızlıq halarının aradan qaldırılıması, "Şərqi Avropada və Cənubi Qafqazda sığınacaq sistemlərinin keyfiyyətinin artırılması təşəbbüsü" layihəsi çərçivəsində DMX-nin əldə etdiyi nailiyyətlər və layihənin davamı ilə bağlı qarşıda duran vəzifələr və s. məsələlər barədə fikir mübadiləsi aparılıb.
Sonda səmimi qəbula görə təşəkkürünü bildirən xanım S.Volken DMX ilə BMT QAK arasında əlaqələrin daha da möhkəmlənəcəyinə ümidvar olduğunu vurğulayıb.