Bakı. Trend:
Türkiyədə baş verən zəlzələdən sonra Azərbaycan beynəlxalq yardım çağırışını gözləmədən yardım etdi.
Trend-in məlumatına görə, bunu bu gün Türkiyənin Azərbaycandakı səfiri Cahit Bağcı brifinq zamanı deyib.
O qeyd edib ki, zəlzələdən 6 saat keçməmiş Azərbaycandan yardım təyyarəsi yola düşdü.
“Eyni gün daha 3 təyyarə yardıma göndərildi. Qardaş Azərbaycanın bütün bölgələrindəki ürəklər Türkiyə ilə birgə döyündü. Kimin nəyə gücü çatırsa, Bakıdakı yardım məntəqələrinə daşıdı”, -deyə o əlavə edib.
Qeyd edək ki, fevralın 6-da Türkiyənin Kahramanmaraş vilayətinin Pazarcık rayonunda 7,7 bal, Elbistan rayonunda 7,6 bal gücündə iki zəlzələ baş verib. Dərinliyi 7 kilometr olan zəlzələ 10 vilayətdə ciddi dağıntılara səbəb olub. Zəlzələdən zərər çəkmiş 10 vilayətdə üç ay müddətinə fövqəladə vəziyyət rejimi elan olunub. Həmçinin Türkiyədə bir həftəlik matəm elan olunub.