Bakı. Trend:
Pakistan BMT Təhlükəsizlik Şurasının qətnamələrinə uyğun olaraq Kəşmir xalqını və onun öz müqəddəratını təyin etmə hüququnu davamlı şəkildə dəstəkləyir.
Trend xəbər verir ki, bunu Pakistanın Azərbaycandakı səfiri Qasim Mohiuddin Bakıda Kəşmirlə Həmrəylik Günü münasibətilə keçirilən qəbulda çıxış edərkən bildirib.
“Təxminən səkkiz onillikdir ki, kəşmirlilər Hindistanın qanunsuz işğalı qarşısında qeyri-adi dözüm və mətinlik nümayiş etdirirlər. Hindistan tərəfindən qanunsuz işğal olunmuş Cammu və Kəşmirdəki vəziyyət beynəlxalq ictimaiyyət üçün hələ də ciddi narahatlıq mənbəyi olaraq qalır”, – deyə səfir bildirib.
Onun sözlərinə görə, beynəlxalq hesabatlar insan hüquqlarının ciddi pozuntularını, o cümlədən özbaşına həbsləri, kollektiv cəzalandırmaları, yaşayış evlərinin sökülməsini və rəqəmsal azadlıqların məhdudlaşdırılmasını qeyd etməkdə davam edir.
Səfir, həmçinin 2025-ci ilin may ayında gərginliyin eskalasiyasının Kəşmir məsələsinin ədalətli həlli olmadan Cənubi Asiyada dayanıqlı sülhün mümkün olmadığını təsdiqlədiyini vurğulayıb. Bu baxımdan o, beynəlxalq ictimaiyyəti narahatlıq ifadə etməklə kifayətlənməməyə, bölgəyə beynəlxalq müşahidəçilərin buraxılması kimi praktiki addımlar atmağa çağırıb.
Sonda Qasim Mohiuddin Cammu və Kəşmir məsələsində Pakistanın mövqeyinə davamlı dəstəyə görə Azərbaycan hökumətinə və xalqına təşəkkürünü bildirib, İslamabadın azad və qərəzsiz referendum keçirilənədək Kəşmir xalqını dəstəkləməyə davam edəcəyini vurğulayıb.