Son 10 gündə Salyanda ev quşlarının tələf olması halları artmaqdadır. Hər ilin bu vaxtı, qışın gəlişilə əlaqədar bu problem adi qarşılansa da, indi qonşu Türkiyədə quş qripinin tüğyan etməsi ucbatından əhali narahatlıq içindədir. Respublikamızda köçəri quşların əksəriyyətinin yaşadığı Şirvan dövlət qoruğu və Mahmudçala yataqlıqlarının Salyanda yerləşdiyini nəzərə alsaq, narahatlıqların əbəs yerə olmadığını görərik. Artıq Salyan bazarlarına çıxarılan ev quşlarının qiyməti də 5-10 min manat ucuzlaşıb. Əhalinin böyük qismi saxladığı ev quşlarının qırılacağından ehtiyatlanaraq ya onu dəyər dəyməzə satır, ya da kəsib özü yeyir. Yumurtanınn bir ədədinin qiyməti dəyişməyib və 600 manat təşkil edir. Hər ilin qışında Bakı-Astara avtomobil yolunun Salyanın Şorsulu və Sarvan kəndlərindən keçən hissəsində satılan çöl quşlarının bazarına da rast gəlinmir. Yeməkxanalarda isə ümumiyyətlə yerli əhalinin və qonaqların ən çox xoşladığı çöl quşlarından hazırlanan xorəklər verilmir.
Yaranmış narahatlıqla əlaqədar respublika baytarlıq idarəsinin Salyandakı xidmətinin baş həkimi Məhəmməd Həsənov bildirib ki, hər il olduğu kimi indi də ev quşları arasında kütləvi ölüm halları mövcuddur, lakin bu heç də quş qripindən yox, nyukasl və pastirljoz xəstəlikləridir ki, bundan da adətən profilaktik peyvənd edilməmiş ev quşları məhv olur.
"Lakin buna baxmayaraq, fərdi təsərrüfatlarda tələf olmuş quşların nümunələri Bakıdakı laboratoriyaya göndərilərək bizim diaqnozun düzgün olduğunu təsdiqləyir", - deyə o qeyd edib. Eyni zamanda Şirvan dövlət qoruğunda da 7 dəfə seromonitorinq keçirilsə də, quş qripi aşkarlanmayıb. Rayon ərazisində vəhşi çöl quşlarının ətinin satışına qadağa qoyularaq, polis nəzarətindən keçirilib. Sabahdan etibarən mərkəzi bazardakı ev quşlarının satıldığı bazarın fəaliyyətini dayandırmaq üçün əlaqədar təşkilatlara müraciət ediləcək.
Rayon ərazisində quş qripinə qarşı imkan daxilində profilaktik tədbirlər görülsə də, xəstəliyin köçəri quşlar vasitəsilə yayıldığını nəzərə alsaq, təhlükə qalmaqdadır.