Vergilər Nazirliyi Azpetrol holdinqində yoxlamanı başa çatdıraraq yoxlama aktını Azpetrol və Azertrans şirkətlərinə təqdim edib. Bu barədə Trend ə vergilər naziri Fazil Məmmədov bildirib.
"Həm Azpetrol, həm də onun törəmə bölməsi Azertransın fəaliyyətində qüsurlar var, dövlət büdcəsinə vergilərin tam ödənilmədiyi haqqında faktlar aşkarlanıb. Lakin UPEC-də vəziyyət normaldır" - deyə nazir vurğulayıb.
Bir ay ərzində şirkətlərdən cavabın alınması gözlənilir, ancaq istənilən halda biz öz mövqeyimizin dürüstlüyünə əminik.
Onun sözlərinə görə, ümumilikdə şirkətlər tərəifndən təxminən $10 mln. həcmində vəsait büdcədən gizlədilib. Pozuntular əmlakın özəlləşdirilməsi zamanı da aşkarlanıb və həmin faktlar üzrə sənədlər müvafiq orqanlara (Dövlət Əmlakının İdarə Olunması üzrə Dövlət Komitəsi, Respublika Prokurorluğu) təqdim olunub.
"Azpetrol-un bir sıra rəhbər şəxslərinə qarşı cinayət işi qaldırılıb, ona görə həmin faktlar üzrə sənədlər prokurorluğa təqdim olunub" - F.Məmmədov qeyd edib.