"Azadlıq" blokunun yanvarın 26-da keçirəcəyi icazəsiz piketin ünvanı müəyyənləşib. Bu barədə Trend ə piketin Azərbaycan Xalq Cəbhəsi Partiyasından (AXCP) olan təşkilatçısı, partiyanın sədr müavini Həsən Kərimov məlumat verib.
O, qeyd edib ki, blok rəhbərliyi etiraz aksiyasının hansı ünvanda keçiriləcəyinə dair qərar verib. Lakin bu barədə ictimaiyyətə və KİV-lərə açıqlama verilmir. Bu, aksiyanın əvvəlcədən polis əməkdaşları tərəfindən dağıdılmasına mane olmaq məqsədilə edilir.
H.Kərimovun sözlərinə görə, etiraz aksiyası piket formasında keçiriləcək və artıq aksiyanın plakatları hazırlanıb. H.Kərimovun sözlərinə görə, piketdə yalnız sosial-iqtisadi tələblər səsləndiriləcək, bir sıra mühüm sahələrdə qiymətlərin aşağı endirilməsi tələb olunacaq.
Qeyd edək ki, dörd müxalifətçi partiyanı birləşdirən "Azadlıq" bloku Azərbaycanda enerjidaşıyıcılarının, kommunal xidmətlərin qiymətinin artırılmasına etiraz olaraq aksiya keçirməyi planlaşdırır. Bakı Şəhər İcra Hakimiyyəti blokun şəhərin mərkəzi meydanlarında mitinq keçirmək təşəbbüsünə razılıq verməyib.
