...

Azərbaycanın Mülki-Prosessual Məcəlləsinə bir sıra əlavə və dəyişikliklər olunub

Siyasət Materials 16 May 2007 13:03 (UTC +04:00)

Azərbaycan, Bakı / Trend müxbir K. Zərbaliyeva/ Azərbaycanın Mülki-Prosessual Məcəlləsinə bir sıra əlavə və dəyişikliklər olunub. Bu dəyişikliklər ölkə başçısı tərəfindən təsdiq olunub. Ali Məhkəmənin hakimi Əsəd Mirzəyev çərşənbə günü bildirib ki, əlavə və dəyişikliklər vətəndaşların şikayətlərinə operativ baxılmasına, süründürməçilik hallarının aradan qaldırılmasına xidmət edir.

Əlavə və dəyişikliklərdən biri Ali Məhkəmənin səlahiyyətlərinin genişləndirilməsi ilə bağlıdır. Ali Məhkəmə apellyasiya instansiyası məhkəməsi tərəfindən maddi hüquq normalarının pozulduğu və ya düzgün tətbiq edilmədiyi hallarda apellyasiya instansiyası məhkəməsinin qətnamə və ya qərardadını tamamilə, yaxud qismən ləğv edib apellyasiya instansiyası məhkəməsində müəyyən edilmiş hallar və sübutlar əsasında yeni qərar qəbul edə bilər. Dəyişiklikdən öncə isə, Ali Məhkəmə apellyasiya instansiyasının qərarını ya qüvvədə saxlaya, ya ləğv edərək apellyasiya baxışına qaytara, ya da dəyişdirə bilərdi.

Həmçinin Kassasiya şikayətinin verilməsi ilə bağlı müddətlərdə də dəyişikliklər edilib. Dəyişiklikdən öncə kassasiya şikayətinə apellyasiya instansiyası məhkəməsi tərəfindən qətnamə və qərardad qəbul edildikdən sonra 3 ay müddətində baxılırdısa, indi qərardadla bağlı müddət 10 gün müəyyən edilib. İşə Apellyasiya və kassasiya qaydasında baxan məhkəmə işə birinci və apellyasiya instansiya məhkəmələrində baxılması zamanı prosessual normaların kobud pozulmasına yol vermiş hakimlər barəsində xüsusi qərardad çıxara bilər. Hakimlər barəsində çıxarılmış xüsusi qərardad intizam icraatının başlanması üçün apellyasiya və kassasiya instansiya məhkəmələrinin sədrləri tərəfindən Məhkəmə-Hüquq Şurasına göndərilir.

Xəbər lenti

Xəbər lenti