Azərbaycan, Bakı / Trend müxbir İ.Əlizadə/ Avropa Şurası Parlament Assambleyasının (AŞPA) Azərbaycanda apardığı monitorinq prosesinin nə vaxt dayandırılması Azərbaycanda gedən inkişafın səviyyəsindən və Avropa Şurasının məsələlərə baxışı və monitorinq prosesinin ümumi gedişindən asılıdır. Bu barədə çərşənbə axşamı Bakıda hakim Yeni Azərbaycan Partiyası (YAP) Siyasi Şurasının üzvü, Azərbaycanın Avropa Şurası Parlament Assambleyasındakı (AŞPA) nümayəndə heyətinin üzvü, millət vəkili Aydın Mirzəzadə bildirib.
"Bu, ilin sonunda da, on ildən sonra da baş verə bilər. Bu suala birmənalı, konkret cavab vermək mümkün deyil. Bu gün Azərbaycana qarşı monitorinq dayandırılırsa, bu, o demək olar ki, artıq digər ölkələr də iddia edərək onlarin üzərində monitorinqlərin dayandırlmasını tələb etsinlər" - deyə millət vəkili bildirib.
Onun fikrincə, bu gün əsas məsələ Azərbaycanla bağlı monitorinqin dayandırılması deyil. Çünki Azərbaycan bu monitorinq prosesində hər hansı bir problem görmür, ona ünvanlanan suallara tutarlı cavablar verib: "Əsas məsələ Azərbaycan həqiqətlərinin AŞ PA-ya və dünya ictimaiyyətinə çatdırılmasıdır".
Azərbaycan 2001-ci ildə Avropa Şurasına daxil olub. Həmin ildən AŞPA Azərbaycanda monitorinq aparır. Məqsəd rəsmi Bakının Avropa Şurası qarşısında götürdüyü öhdəliklərin yerinə yetirilməsi səviyyəsini öyrənməkdir. Azərbaycan tərəfi hesab edir ki, Azərbaycan Avropa Şurası qarşısında götürdüyü öhdəlikləri yerinə yetirdiyinə görə monitorinq prosesi dayandırılmalıdır.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
