Azərbaycan, Bakı / Trend müxbir K. Zərbalıyeva/ Azərbaycan Silahlı Qüvvələrinin Mühafizə Briqadasının həbsdə olan sabiq komandir müavininə 8 il iş verilib. Trend in məlumatına görə, bazar ertəsi Ağır Cinayətlərə Dair İşlər üzrə Hərbi Məhkəmənin hökmü ilə təkrar rüşvət almaqda ittiham olunaraq 8 il azadlıqdan məhrum edilən Rasim Muradovun polkovnik-leytnant hərbi rütbəsindən məhrum edilməsi üçün Müdafiə Nazirliyinə təqdimat göndərilib.
Məhkəmənin hökmü ilə razılaşmayan Muradov məhkəmə prosesində vəkili vasitəsilə apellyasiya şikayəti verəcəyini deyib.
Prokuror məhkəmədəki çıxışında Muradova əmlakı müsadirə olunmaqla 9 il iş verilməsini istəmişdi.
İyulun 24-də həbs olunan polkovnikə qarşı Cinayət Məcəlləsinin təkrar rüşvət alma (311.3.2-ci) maddəsi ilə ittiham irəli sürülüb.
Muradov barəsində mart ayında Mühafizə Briqadasının komandiri, polkovnik Mirzəli Yusifov tərəfindən cinayət işi açılıb.
İbtidai istintaq zamanı Muradova rüşvət alma və vəzifədən sui-istifadə ilə bağlı ittihamlar üzrə sübut tapılmadığı üçün bu ittihamlar onun üzərindən götürülüb.