Azərbaycan, Bakı, 28 yanvar / Trend , müxbir K.Zərbalıyeva/ Azərbaycanda işgəncə faktlarının araşdırılması üçün dövlət tərəfindən İşçi qrupun yaradılmasına ehtiyac var.
Bu barədə Azərbaycan İşgəncələr Əleyhinə Komitənin sədri Elçin Behbudov bazar ertəsi ölkə prezidentinə müraciət edib.
Behbudov bildirib ki, Azərbaycanda kifayət qədər işgəncə faktları qeydə alınsa da, rəsmilər bu faktları inkar edirlər. Hüquq müdafiəçisi hesab edir ki, hüquq-mühafizə orqanlarının, Səhiyyə Nazirliyinin və Azərbaycan İşgəncələr Əleyhinə Komitənin nüamyəndələrindən ibarət İşçi qrup qeydə alınan işgəncə faktlarını araşdırmalı və cavabdehlərin cəzalandırılması üçün təxirəsalınmaz tədbirlər görülməlidir.
Behbudov işgəncə faktlarının daha çox polis orqanlarında qeydə alındığını vurğulayıb.
O, ötən ilin yekunları ilə bağlı rəhbərlik etdiyi Komitənin illik hesabat hazırladığını və hesabatın işgəncələrlə bağlı beynəlxalq təşkilatlara, hökumətə təqdim olunacağını deyib.
Daxili İşlər Nazirliyinin rəsmiləri isə mətbuata açıqlamalarında polis orqanlarında işgəncə faktlarının olması ilə bağlı məlumatları təkzib ediblər.
Ombudsman Elmira Süleymanova da mətbuata açıqlamasında polisdə işgəncə faktlarının olduğunu bildirib və cavabdeh şəxslərin cəzalandırılmasını vacib sayıb.
Prezidentin İcra Aparatının hüquq-mühafizə orqanları ilə iş üzrə şöbəsinin müdiri Fuad Ələsgərov DİN-in kollegiya iclasındakı çıxışında bildirib ki, İnsan Haqları üzrə Avropa Məhkəməsinin Azərbaycanda vətəndaşların hüquqlarının pozulmasına dair çıxardığı qərarların bir qismi polis orqanlarındakı neqativ hallarla bağlıdır.
Ələsgərov deyib ki, vətəndaşların hüquqlarının pozulması ilə bağlı müəyyənləşdirilən işlərlə əlaqədar Azərbaycan dövləti təzminat ödəyib. Onun sözlərinə görə, bu cür halların baş verməməsi üçün Azərbaycan polisi Cinayət-Prosessual və İnzibati qanunvericiliyə riayət etməli və buna diqqətini artırmalıdır.
