Azərbaycan, Bakı, 1 fevral / Trend , müxbir K.Zərbalıyeva / Azərbaycanın məhkəmə-hüquq sistemində 90-cı illərin sonu, 2000-ci ildən başlayaraq önəmli islahatlar həyata keçirilir və bu sistemin beynəlxalq standartlara uyğunlaşması üçün müvafiq işlər görülüb. Bunu cümə günü Trend ə müsahibəsində Türkiyənin Ədalət Bakanlığı ilə Azərbaycanın Məhkəmə-Hüquq Şurası arasında əldə olunmuş razılaşma çərçivəsində Azərbaycanda səfərdə olan Ankara baş prokurorunun müavini Nuri İgid deyib.
İgid hakimliyə namizədlərə "Türkiyənin hüquq sistemi", "Hakimlərin etik davranış məsələləri", "Məhkəmə qərarlarının icrasında hakimin rolu" mövzularında mühazirələr deyib.
Prokuror müavini Türkiyə və Azərbaycanda məhkəmə hakimlərinin seçimində fərqli ünsürlər olduğunu və bu prosesin həmin ölkələrin öz qanunvericilikləri əsasında tənzimləndiyini qeyd edib.
"Öz-özlüyündə hər iksi də eynidir, amma üsul və idarəetmə sahəsində müxtəlif fərqlər var. Burda imtahanların keçirilməsi, hakimlərin seçilməsi ilə bağlı prosesləri Hakimlərin Seşki Komitəsi həyata keçirir. Türkiyədə isə Hakimlər və Savcılar Yüksek Kurumu tərəfindən aparılır. Hər iki ölkənin hakim seçiminin özəllikləri var və bu onların qanunlarına, ənənəsinə uyğun aparılır" - deyə prokuror bildirib.
Hakimliyə namizədlərin hazırlıq səviyyəsindən razı qalan türkiyəli mütəxəssis bildirib ki, Azərbaycanda yaxın gələcəkdə hakim korpusunun daha peşəkar, təcrübəli, ədalətli hakimlərdən formalaşacağına əmindir və bu sahədə ölkəmiz üçün heç bir problem olmayacaq: "Onlar hələ işin başlanğıcındadır. "Bir hakim necə olmalıdır?" sualına onlardan aldığım cavab məni çox məmnun etdi. Onları çox təcrübəli, mütəxəssis, işlərinə maraqlı gördüm. Azərbaycanın bu sahədə bir problemi olduğunu düşünmürəm".
Məhkəmə qərarlarının icrası sahəsində Azərbaycanla Türkiyə arasında fərq olduğunu deyən İgid qeyd edib ki, Türkiyədə inzibati məsələlər, mübahisələr inzibati məhkəmələr tərəfindən həll olunur. Bu məhkəmələr dövlətin bir çox işlərini hüquqi tərəfdən istiqamətləndirir. "Azərbaycan İnzibati Məhkəmə yaratmağa ehtiyac duyarsa, bu yöndə bizim faydamız ola bilər. Türkiyənin bu sahədə təcrübəsi var".
Türkiyəli mütəxəssis Azərbaycanın cinayət işləri ilə bağlı məhkəmə qərarlarının icrası sahəsində olduqca böyük təcrübəyə malik olduğunu vurğulayıb.
Onun sözlərinə görə, Türkiyədə məhkəmə qərarlarının icrası ilə bağlı ciddi problem yoxdu. "Azərbaycanda da olduğunu düşünmürəm. Sadəcə, məhkəmə qərarlarının icrasını daha da sürətləndirəcək tədbirlərin görülməsi vacibdir" - deyə İgid vurğulayıb.
Azərbaycanın prokurorluq sistemi ilə Türkiyənin prokurorluq sistemi arasındakı fərqə toxunan Ankara baş prokurorunun müavini deyib ki, Azərbaycandan fərqli olaraq Türkiyədə ölkə prokurorluğu yoxdur: "Yəni prokurorluq bir mərkəzdən idarə olunmur. Türkiyədə hər bir şəhərdə ağır cəza mərkəzləri bazasında Baş Savcılıqlar (prokurorluqlar) var. Digər bir fərq isə Azərbaycanda prokurorluq və məhkəmələr ayrı-ayrı binalarda yerləşir. Türkiyədə isə bu qurumlar eyni binalarda yerləşir".
İgid qeyd edib ki, məhkəmələrin və prokuroluğun bir binada yerləşməsi Türkiyədə prokuroluğun məhkəmələrin fəalyyətinə müdaxiləsinə səbəb olmur. "Hər iki qurum fəaliyyətlərində tam müstəqildir, biri digərinin işinə müdaxilə etmir" - deyə İgid vurğulayıb.