Azərbaycan, Bakı, 17 mart / Trend , müxbir K.Zərbalıyeva/ DİN-in Baş Cinayət-Axtarış İdarəsinin sabiq rəisinin kassasiya şikayəti Ali Məhkəmənin icraatındadır.
Ali Məhkəmədən bazar ertəsi Trend a bildirilib ki, sabiq rəis Hacı Məmmədovun kassasiya şikayəti hakim Tapdıq Mahmudovun icraatındadır.
Hakim Mahmudov şikayətə baxılma vaxtının hələ müəyyənləşdirilmədiyini deyib.
Məmmədovla birgə dəstənin digər üzvləri Baş Cinayət-Axtarış İdarəsinin sabiq rəisi Zakir Nəsirov, Kamil Sədrəddinov və başqaları da hökmdən kassasiya şikayəti veriblər.
Çoxsaylı qətllərdə, adam oğurluğunda, ölümə sui-qəsddə, qanunsuz silah saxlamaqda və digər ağır cinayətlərdə ittiham olunan Məmmədov və rəhbərlik etdiyi dəstənin 25 üzvündən 10 nəfəri ömürlük azadlıqdan məhrumetmə cəzasına məhkum olunub.
Ağır Cinayətlərə Dair İşlər üzrə Məhkəmədə hakim Əli Seyfəliyevin sədrliyi ilə keçirilən məhkəmənin hökmü ilə Hacı Məmmədov (əmlakı müsadirə olunmaqla), Fərhad Məmmədbəyov (əmlakı müsadirə olunmaqla), Eldar Rəhimov (əmlakı müsadirə olunmaqla), Malik Məmmədov (əmlakı müsadirə olunmaqla), Husain Abdulvahabov, Zakir Nəsirov (əmlakı müsadirə olunmaqla), Kamil Sədrəddinov (əmlakı müsadirə olunmaqla), Musa Dabuyev, Aslanbek Çintamirov, Yagir Məmmədov ömürlük həbs cəzasına məhkum ediliblər. Digər təqsirləndirilən şəxslər Nizami Abdullayev (əmlakı müsadirə olunmaqla), Sidek Abdulvahabov, Rövşən Ağayev 15 il, Nailə Quliyeva (əmlakı müsadirə olunmaqla) 13 il, Ədalət Əsədullayev, Novruz Nuriyev 12 il, Əliqulu Quliyev, Nişad İsmayılov (əmlakı müsadirə olunmaqla) 10 il, Faiq Quliyev, Elçin Əliyev (əmlakı müsadirə olunmaqla) 9 il, Mehman Həsənov, Fariz Həmidov və Elşən Mirzəyev 8 il iş alıb. Aqil Hüseynov (2 il maddi məsuliyyətlə bağlı vəzifə tutmamaq şərti ilə) 2 il şərti, Azər Əliyev 2 il şərti azadlıqdan məhrum edilib. İbrahim Bağırov isə dövlətə vurduğu ziyanı ödədiyi üçün barəsindəki cinayət işinə xitam verilib.
