Azərbayan, Bakı, 21 oktyabr / Trend , müxbir İ.Əlizadə/ Azərbaycan Prezidenti yanında Əfv Komissiyasının üzvü hesab edir ki, ölkədə yeni əfv fərmanının imzalanmasına ehtiyac var.
"Mən əfv fərmanının imzalanmasını istəyirəm və buna ehtiyac var", - çərşənbə axşamı Trend -a Azərbaycan Prezidenti yanında Əfv Komissiyasının üzvü, millət vəkili Vaqif Səmədoğlu bildirib.
Trend - un arayışı: Azərbaycanda 1994 - cü ildən indiyədək imzalanan 45 əfv fərmanı ilə 4858 şəxs cəzadan azad edilib. Fərmanların 32-si isə mərhum prezident Heydər Əliyev, 13-ü indiki prezident İlham Əliyev tərəfindən imzalanıb. İndiyədək imzalanan 8 Amnistiya Aktı 40 min məhkuma şamil olunub.
Hər il Azərbaycanda bir neçə dəfə əfv fərmanının imzalandığını vurğulayan Komissiya üzvü qeyd edib ki, artıq bu fərmanların imzalanması hansısa tarixi günlərlə bağlı deyil.
"Ona görə də yeni ilə qədər də əfv fərmanı imzalana bilər və bu mümkündür",- Səmədoğlu əlavə edib.
Komissiya üzvü bildirib ki, həbsdə olan jurnalistlərin əfv olunmasına tərəfdardır.
"Həbsdə olan jurnalistlərin məsələsinin həll olunması yaxşı olardı. Hesab edirəm ki, onların günahları varsa, kifayət qədər cəza çəkiblər", - Əfv Komissiyasının üzvü deyib.
Azərbaycanda hazırda üç jurnalist - müxalifətyönlü "Azadlıq" qəzetinin baş redaktoru Qənimət Zahid (4 il), həmin qəzetin yazarı, satirik şair Mirzə Sakit (3 il) və "Gündəlik Azərbaycan" və "Realnıy Azərbaycan" qəzetlərinin baş redaktoru Eynulla Fətullayev (8 il 6 ay) həbsdədir.
Səmədoğlunun sözlərinə görə, son günlər Əfv Komissiyasının iclasları keçirilmir. Amma komissiya üzvlərinə müraciətlər daxil olur. "Mən 100 - dən artıq müraciət almışam və onları Prezident Aparatına təqdim etmişəm".
Məqalə müəllifi ilə əlaqə ünvanı: [email protected]