Azərbaycan, Bakı, 10 dekabr / Trend , müxbir K.Zərbalıyeva/ Narkotiklərin qanunsuz dövriyyəsində ittiham olunan Azərbaycan Konstitutsiya Məhkəməsinin hakimi Südabə Həsənovanın qardaşı oğlu istintaqın qeyri - obyektiv aparılmasına etiraz olaraq aclıq aksiyası keçirir.
Azərbaycan İşgəncələr Əleyhinə Komitənin sədri Elçin Behbudov çərşənbə günü Trend - a bildirib ki, bu gün təqsirləndirilən Yalçın Həsənovla saxlandığı 1 saylı İstintaq Təcridxanasında görüşüb.
Həsənov bir neçə gündür aclığa başladığını, ittiham olunduğu maddələr üzrə özünü təqsirli bilmədiyini deyib. Təqsirləndirilən istintaqın qərəzli aparıldığını bildirib və cinayət işinin istintaqının Baş Prokuroluğa verilməsini istəyib.
Behbudov məsələ ilə bağlı aidiyyatı qurumlara müraciət edəcəyini deyib.
Azərbaycanda narkotiklərin qanunsuz dövriyyəsində ittiham olunan Bakının sabiq prokuroru Ədalət Mirsalamovun, Əzizbəyov rayonunun sabiq prokuroru Rəşid Həsənovun və xalq artisti İlhamə Quliyevanın övladlarının da daxil olduğu 17 nəfərlik dəstənin cinayət işi üzrə məhkəmə prosesi şahidlərin ifadələri ilə davam etdirilir.
Adıçəkilən şəxslər bu ilin mayında, narkotik vasitələrin satışı ilə məşğul olduqları üçün, Milli Təhlükəsizlik Nazirliyinin keçirdiyi əməliyyat zamanı saxlanılıblar və barələrində həbs qətimkan tədbiri seçilib. Onların narkotik vasitə olan ekstazinin qanunsuz dövriyyəsində günahlandırıldıqları bildirilir.
Dəstə üzvlərinə qarşı Cinayət Məcəlləsinin qaçaqmalçılıq (206), satış məqsədi olmadan qanunsuz olaraq narkotik vasitələri və ya psixtrop maddələri şəxsi istehlak miqdarından artıq miqdarda əldə etmə və ya saxlama (234.1 - ci) və qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma(234.4.1-ci) maddələri ilə cinayət işi açılıb.
Məqalə müəllifi ilə əlaqə ünvanı:[email protected]