Azərbaycan, Bakı, 22 yanvar / Trend , müxbir S.Kazımlı/ Azərbaycanın Qarabağ Azadlıq Təşkilatının (QAT) Ağsu rayon şöbəsinin sədri Elşən Məmmədov polis əməkdaşları tərəfindən saxlanılıb. Ona qarşı antireferendum təbliğatının aparılması ilə bağlı ittiham irəli sürülüb.
Trend -un məlumatına görə, bu barədə cümə axşamı QAT-ın yaydığı bəyanatda bildirilib. Bəyanatda qeyd edilib ki, Ağsu rayon icra və hüquq-mühafizə orqanları müxtlif bəhanələrlə yerli şöbənin fəaliyyətinə mane olmaq üçün dəfələrlə cəhd göstəriblər. "Hətta yerli şöbənin bağlanması tələblərini irəli sürüblər", -deyə QAT-ın bəyanatda qeyd olunub.
Ağsu rayon Polis Şöbəsinin rəis müavini Mehman Məmmədov isə cümə axşamı Trend -a bildirib ki, Elşən Məmmədov çərşənbə günü polis şöbəsinə çağırılaraq dindirilib.
"Elşən Məmmədov başqa bir məsələ ilə bağlı polis şöbəsinə çagırılaraq 15-20 dəqiqə dindirildikdən sonra sərbəst buraxılıb", - deyə rəis müavini əlavə edib.
Rəis müavini Məmmədova qarşı hec bir təzyiq edilmədiyini və onun ictimai fəaliyyətinə mane olunmadığını söyləyib. "İndiyə kimi QAT-ın yerli şöbəsinin fəaliyyətinə qarşı heç bir maneə törətməmişik. Onlarla bizim aramızda hec bir anlaşılmazlıq baş verməyib", - deyə o bildirib
Məqalə müəllifi ilə əlaqə ünvanı: [email protected]