Azərbaycan, Bakı, 11 fevral / Trend , müxbir K.Zarbalıyeva, C.Babayeva/ Azərbaycan hökuməti Xocalı soyqırımı ilə bağlı Ermənistan dövlətinin Beynəlxalq Cinayət Məhkəməsinə (Haaqa məhkəməsi) verilməsini araşdırır, çərşənbə günü Trend -a Prezidentin İcra Aparatının İctimai-siyasi şöbəsinin müdiri Əli Həsənov bildirib.
"Ermənistanın azərbaycanlılara qarşı soyqırım törətməsi faktları ortadadır. Neçə illərdir ki, araşdırıb, dünya ictimaiyyətinə çatdırırıq. Haaqa məhkəməsində bu məsələnin qaldırılması mümkündürsə, bundan niyə çəkinməliyik", - Həsənov deyib.
Trend -un arayışı: 1992-ci il fevralın 26-da Ermənistan hərbi birləşmələri yeddi min əhalisi olan Xocalı şəhərində soyqırım aktı həyata keçiriblər. Ermənistan hərbi birləşmələrinin şəhərə hücumu zamanı burada yalnız üç minə yaxın insan qalıb. Çünki mühasirədə qaldığı 4 aydan artıq zaman ərzində blokadada olduğu üçün əhalinin xeyli hissəsi şəhərdən çıxmaq məcburiyyətində qalmışdı. Xocalı soyqırımı zamanı 613 nəfər ödürülüb, 1000 nəfər müxtəlif yaşlı dinc sakin aldığı güllə yarasından əlil olub. 106 nəfər qadın, 63 azyaşlı uşaq, 70 qoca öldürülüb. 8 ailə tamamilə məhv edilib, 25 uşaq hər iki valideynini, 130 nəfər valideyinlərindən birini itirib. Faciə baş verən gecə 1275 nəfər dinc sakin girov götürülüb, onların 150 nəfərin taleyi indi də məlum deyil.
Azərbaycan Milli Məclisinin (parlamenti) ötən illərdə Xocalı soyqırımı ilə bağlı qəbul etdiyi qərarda göstərilib ki, cinayətin təşkilatçıları Ermənistan silahlı qüvvələrinin bölmələri, Dağlıq Qarabağdakı erməni terrorçu dəstələri, keçmiş SSRİ-nin Xankəndi şəhərində yerləşən 366-cı motoatıcı alayının şəxsi heyətinin üzvləridir. Xocalıya hücum əməliyyatına Seyran Ohanyan, Yevgeni Nabokin, Valeri Mkrtçyan rəhbərlik edib.
Xocalı soyqırımında əli olan cinayətkarlar 366-cı alayda xidmət edən Slavik Arutunyan, Andrey İşxanyan, Sergey Beqlayran, Movses Akopyan, Qriqori Ksebkyan, Vaçik Mirzoyan, Vaçaqan Ayriyan, Aleksandr Ayrapetyan və digərləri olub.
Dinc əhalinin gülləbaran edilməsində erməni silahlı birləşmələrinin üzvlərindən Karo Petrosyan, Vitali Balasanyan, Seyran Tumasyan, Valeri Qriqoryan və digərləri iştirak ediblər.
Dinc əhaliyə qəddarcasına divan tutanlar arasında Xankəndi şəhər daxili işlər şöbəsinin rəisi işləmiş Armo Abramyanın, Əsgəran daxili işlər şöbəsinin rəisi Mavrik Qukasyanın, onun müavini Şagen Barisqyanın, Dağlıq Qarabağda erməni Xalq Cəhbəsinin sədri olmuş Vitali Balasanyanın, Xankəndi şəhər həbsxanasının rəisi işləmiş Serjik Köçəryanın və digər şəxslərin olduğu müəyyən edilib.
Həsənovun sözlərinə görə, Xocalı soyqırımı ilə bağlı Ermənistanın Beynəlxalq Cinayət Məhkəməsinə (Haaqa məhkəməsinə) verilməsi ilə bağlı ayrı-ayrı qeyri-hökumət təşkilatları və hadisə ilə əlaqəsi olan digər qurumlar tərəfindən təşəbbüslər var.
Baş Pokurorluğun mətbuat xidmətinin rəhbəri Eldar Sultanov isə çərşənbə günü Trend -a bildirib ki, Xocalı soyqırımında iştirak etdiyi üçün 39 nəfər beynəlxalq axtarışa verilib. Onlar sırasında 366-cı alayın komandiri Yuri Zarviqorov da var.
Onun sözlərinə görə, Xocalı soyqrımı ilə bağlı Baş prokurorluqda Cinayət Məcəlləsinin 103-cü (soyqırım) və əhalini deportasiya etmə və ya məcburi köçürmə (107) maddələri ilə cinayət işi açılıb, istintaq aparılır.
Məqalə müəllifi ilə əlaqə ünvanı: [email protected]
