Azərbaycan, Bakı, 11 fevral / Trend , müxbir K.Zərbalıyeva/
Ötən il Sumqayıt (paytaxt Bakıdan 35 kilometr aralı) təhsilin səviyyəsinə görə respublikada birinci olub.
"2009-cu ildə də qəbul imtahanlarında yüksək bal toplayanların sayına görə şəhərimiz respublikanın digər bölgələri arasında birinci olub. Şəhərimizin 101 nəfər abituriyenti ötən il qəbul imtahanlarında 600-dən yuxarı bal toplayıb. Bu rəqəm respublikanın şimal rayonlarına daxil olan 8 rayon üzrə məzunların ümumi sayından 2,4 dəfə çoxdur. Trend -un məlumatına görə, bu barədə Sumqayıt şəhər Təhsil şöbəsinin müdiri Vidadi Bağırov şəhər İcra Hakimiyyətində keçirilən yığıncaqda bildirib.
Şöbə müdirinin sözlərinə görə, bütün fənlərin nəticələrinə görə, Sumqayıt seçilən 10 rayon arasında yuxarı sıralarda qərarlaşıb, ana dili və ingilis dili fənləri üzrə isə birinci yeri tutub. İmtahan fənləri üzrə bütövlükdə Azərbaycan bölməsində Sumqayıt şəhəri bölgələr arasında ən yüksək nəticə göstərib.
Eyni zamanda 2009-cu ildə 11-ci siniflərdə Azərbaycan Respublikası Təhsil Nazirliyi tərəfindən aparılan buraxılış imtahanları zamanı şəhər məzunlarının 96 faizi yaxşı qiymət almışdır ki, bu da respublikada ən yüksək nəticə olub.
