Azərbaycan, Bakı, 12 noyabr /Trend, müxbir M.Əliyev/
Bakı şəhəri üzrə Təhsil İdarəsi (BŞTİ) noyabrın 20-dən orta məktəblərdə reydlərə başlayacaq. Bu barədə Trend-ə İdarənin İctimaiyyətlə əlaqələr sektorunun müdiri Zəminə Əliqızı bildirib.
"Reydlər zamanı şagirdlərin məktəbli geyimlərinə riayət etmələri yoxlanılacaq", - Əliqızı deyib.
2010-cu il sentyabrın 15-dən Bakı məktəblərinin ibtidai sinif şagirdlərinin (I-IV sinif) vahid məktəbli geyiminə keçidi həyata keçirilir. Valideynlərin xahişi ilə BŞTİ bu prosesin tamamlanması üçün qoyulan vaxtı noyabrın 1-dək uzadıb. "Bakı Tikiş" Açıq Səhmdar Cəmiyyəti I-IV sinif şagirdləri üçün onların sayı qədər, yəni 120 min geyim tikib. İbtidai sinifdə oxuyan oğlanlar üçün göy rəngli, aşağı hissəsi bağlanan pencək-şalvar, eyni rəngdə jilet, ağ köynək və qara ayaqqabı, qızlar üçün isə ağ uzunboğaz çorab, ağ xətlərlə damalı qara yubka, göy peycək, tünd qırmızı jilet, ağ köynək müəyyən olunub.
İbtidai sinif şagirdləri üçün geyimlərin qiyməti 28-30 manat müəyyən olunub.
Əliqızı bildirib ki, reydlər zamanı həmçinin şagirdlərin dərsə davamiyyəti, müəllimlərin proqrama uyğun hazırlıq səviyyəsi, məktəbin tərtibatı, eləcə də sənədləşmə işlərinin aparılması yoxlanılacaq.
Onun sözlərinə görə, reydlər bir neçə gün davam etdiriləcək və sonda reydlərin müzakirəsi keçirilərək nəticələri açıqlanacaq.