Azərbaycan, Bakı, 19 fevral/Trend/
Bu günlərdə Azərbaycanda səfərdə olan Türkiyənin TRT kanalının əməkdaşları və bir qrup jurnalist millət vəkili Qənirə Paşayeva ilə görüşüblər.
Qardaş ölkə jurnalistləri bildiriblər ki, səfərlərində əsas məqsəd, Azərbaycan haqqında, Dağlıq Qarabağ münaqişəsi və ümumiyyətlə Azərbaycan həqiqətləri barədə televiziya proqramı və sənədli film çəkmək, habelə, nüfuzlu dərgi və qəzetlərdə yayınlanacaq məqalələr hazırlamaqdır.
Millət vəkili Azərbaycan həqiqətlərini sənədli filmlər və proqramlar vasitəsilə qardaş Türkiyə ictimaiyyətinə daha geniş miqyasda çatdırılmasının çox vacib olduğunu vurğulayıb, öz fikir və mülahizələrini bölüşüb.
Xanım Paşayeva jurnalistlərə Ermənistanın işğal altında saxladığı Azərbaycan torpaqlarında törətdiyi vandalizm aktları, azərbaycanlılara məxsus tarixi-mədəni, dini abidələri və qəbirstanlıqları dağıtmaları, Xocalı soyqırımı da daxil olmaqla dinc azərbaycanlılara qarşı törətdilən soyqırım aktları, həmçinin , 1 milyon azərbaycanlı qaçqın və məcburi köçkünün öz yurd-yuvasına dönməsinə imkan verilməməsi barədə ətraflı məlumatların əks olunduğu müsahibə verib.
Jurnalistlərə Azərbaycan həqiqətlərinə dair çoxlu sayda kitab, sənədli film və videomateriallar təqdim edən millət vəkili Paşayeva, müsahibəsində, Ermənistandan işğal etdiyi Azərbaycan torpaqlarından çıxmasını tələb edən beynəlxalq təşkilatların qətnamə və sənədləri barədə də jurnalistləri bilgiləndirib. O, eyni zamanda ermənilərin tarixi Azərbaycan torpaqlarına 19-cu əsrdən başlayaraq Rus imperiyası tərəfindən məqsədli şəkildə köçürülməsi, bunun arxasında dayanan maraqlar və buna etiraz edən azərbaycanlılara qarşı edilən təzyiq və təqiblərdən də danışıb.
Xanım millət vəkili bildirib ki, bu günkü Ermənistan dövlətinin yerləşdiyi ərazilər tarixi Azərbaycan torpaqlarıdır və ermənilərin bu torpaqlara köçürülməsi ilə yanaşı azərbaycanlıların zorla öz torpaqlarından çıxarılması, deportasiya olunması prosesi də aparılmış və bu bədnam siyasət həm Rus imperiyası həm də SSRİ rəhbərliyi tərəfindən məqsədli şəkildə həyata keçirilib.
Paşayeva erməni silahlılarının, erməni terror təşkilatlarının 1905-07, 1918-ci illərdə Azərbaycan torpaqlarında törətdiyi soyqırımlar, 1948-53-jü ildə yüz minlərlə azərbaycanlının bu günkü "Ermənistan" ərazisindən - öz ata-baba yurdlarından zorla deportasiya edilmələri, 1988-ci ildə Ermənistan dövlətinin apardığı etnik təmizləmə siyasəti nəticəsində bütün azərbaycanlıların Ermənistandan zorla qovulması və bu gün orada bir nəfər belə olsun azərbaycanlınan yaşamaması barədə də jurnalistlərə ətraflı məlumat verib.
Millət vəkili Azərbaycan həqiqətlərinin beynəlxalq ictimaiyyətə daha geniş çatdırılması istiqamətində Prezident İlham Əliyev və Heydər Əliyev Fondunun prezidenti Mehriban xanım Əliyevanın gördüyü işlərdən də danışıb. O, deyib ki, qardaş ölkələr olan Azərbaycan və Türkiyə, o cümlədən hər iki ölkənin xaricdəki diasporları, Xocalı soyqırımının beynəlxalq ictimaiyyətə çatdırılması, tanıdılması istiqamətində birlikdə daha sıx çalışmalıdırlar və bu hər iki ölkə üçün çox önəmlidir.
Sonra millət vəkili jurnalitsləri Ermənistanın işğal etdiyi Azərbaycan torpaqlarında törədilmiş soyqırım və vandalizm aktlarının canlı şahidləri olmuş, ev-eşiklərini itirmiş qaçqın və məcburi köçkünlərlə görüşdürüb. Jurnalistlərə müsahibə verən qaçqın və məcburi köçkünlər, Ermənistanın törətdiyi insanlıq dramı və vandalizm aktları ilə bağlı ətraflı məlumatlar vermiş və vurğulamışlar ki, onların əsas arzusu öz yurd-yuvalarına qayıtmaqdır. Qaçqın və məcburi köçkün soydaşlarımız bu istiqamətdə qardaş Türkiyənin indiyədək göstərmiş olduğu dəstəyin gələcəkdə daha da artacağını gözlədiklərini bildiriblər.
Jurnalistlər millət vəkilinə sənədli filmin və proqramların mümkün olan ən qısa zamanda ərsəyə gətirəcəklərini və yayımını təşkil edəcəklərini bildiriblər.
Bu silsilədən ilkin proqramlar və məqalələr artıq yaxın günlərdə nümayiş olunacaq.