Azərbaycan, Bakı, 13 fevral /Trend, müxbir E.Mehdiyev/
Azərbaycanın Ukraynadakı səfirliyi Azov dənizində buzlanma səbəbi ilə hərəkətini dayandıran gəmilərdə olan 10 Azərbaycan vətəndaşının vəziyyətini araşdırır.
Səfirlikdən bazar ertəsi Trend-ə verilən məlumata görə, bununla bağlı səfir tərəfindən tapşırıq verilib, hazırda səfirlyinin əməkdaşları bu işlə məşğul olur.
Qeyd edək ki, Azov dənizində, Temryuk limanı yaxınlığında dənizin donması səbəbi ilə 6 gəmi hərəkət edə bilmir. Rusiya KİV-i gəmilərdə 10 Azərbaycan vətəndaşının olduğu barədə məlumat yayıb.
Azərbaycan Dövlət Dəniz Administrasiyasından Trend-ə bildirilib ki, Uzaq Məsafədən Tanınma və İzləmə Milli Mərkəzindən həmin gəmilərlə əlaqə saxlanılır və həmin gəmilərdə azərbaycanlıların olub-olmaması və onların vəziyyəti öyrəniləcək.