Azərbaycan, Bakı, 2 mart / Trend müxbir K.Zərbalıyeva/
Azərbaycanda qadınlar tərəfindən ombudsmana ünvanlanan müraciətlərin böyük əksəriyyəti məhkəmə, əmək, mənzil və sosial təminat hüquqlarının pozuntusu ilə bağlı olub. Trend-in xəbərinə görə, bu barədə Azərbaycanda insan hüquqlarının və azadlıqlarının təmin edilməsi və müdafiəsinin vəziyyəti haqqında ombudsman Elmira Süleymanovanın 2011-ci il üzrə illik məruzəsində bildirilir.
Məruzədə qeyd olunur ki, ötən il müvəkkilin ünvanına qadınlar tərəfindən 3251 müraciət daxil olub.
Qadınlar tərəfindən müvəkkilə ünvanlanan müraciətlər əsasən şəhid ailələrinin mənzillə təmin olunması, dini etiqad azadlığının təmini, əmək hüquqları, alimentin alınması və məhkəmə qərarlarının icrası, məişət zorakılığı, təhsil, mülkiyyət, sağlamlığın qorunması və azad sahibkarlıq hüquqları, sosial müavinətlərin alınması ilə bağlı olub.
Onlardan 603-ü məhkəmə hüququnun pozuntusu, 439-u mənzil, 369-u sosial təminat, 328-i əmək hüququ, 194-ü aliment, 216-sı ünvanlı sosial yardım, 17-si azad sahibkarlıq, 30-u zorlama, 44-ü müavinət, 108-i sağlamlıq, 81-i kompensassiya ödənilməsi hüququnun pozulması, 146-sı isə məişət zorakılığı ilə bağlı olub.
Müvəkkilin səlahiyyəti çərçivəsində baxılan şikayətlərin 1231-i təmin olunub.
Müraciət edənlərin 178-i əlil, 146-sı məcburi köçkün və qaçqın qadınlar olub.
Azərbaycanda qadınlar daha çox məhkəmə, əmək, mənzil və sosial təminat hüquqlarının pozuntusundan şikayətlənir
Azərbaycanda qadınlar tərəfindən ombudsmana ünvanlanan müraciətlərin böyük əksəriyyəti məhkəmə, əmək, mənzil və sosial təminat hüquqlarının pozuntusu ilə bağlı olub.