Azərbaycan, Bakı, 23 yanvar /Trend, müxbir İ.İsabalayeva/
Azərbaycan Milli Elmlər Akademiyasında (AMEA) təbii fəlakətlərlərin kompleks şəkildə öyrənilməsi məqsədilə ayrıca strukturun yaradılacağı gözlənilir. Trend-in məlumatına görə, bunu çərşənbə günü AMEA prezidenti Mahmud Kərimov bildirib.
Onun sözlərinə görə, bu məqsədlə AMEA-da təbii fəlakətlərlə bağlı ayrıca şöbə və ya mərkəz yaradıla bilər.
"Ayrı-ayrı qurumlarda bu problemlər öyrənilir. Amma təbii fəlakətləri kompleks şəkildə öyrənmək lazımdır", - Kərimov deyib.
Onun fikrincə, Azərbaycanda son illər təbii fəlakətlərin artması bu sahə üzrə geniş tədqiqatların aparılmasını zəruri edib.
"Sel, zəlzələ, dolu kimi təbii fəlakətlər tez-tez baş verir. Buna görə də bu fəlakətlərin proqnozlaşdırılması, tədqiq olunması çox vacibdir", - AMEA prezidenti əlavə edib.