Azərbaycan, Bakı, 7 fevral /Trend, müxbir İ.İzzət/
Azərbaycanda ötən ay 1 mina/PHS hadisəsi qeydə alınıb. Bu barədə Trend-ə Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) mətbuat xidmətindən məlumat verilib.
Məlumata görə, 2014-cü ilin yanvar ayı ərzində Azərbaycanda 1,942,923 kvadratmetr ərazi yoxlanılıb, mina və partlamamış hərbi sursatdan (PHS) təmizlənib. Təmizləmə əməliyyatları zamanı 409 PHS, 13 ədəd tank və 1 ədəd piyada əleyhinə mina aşkar edilərək zərərsizləşdirilib.
Əməliyyatlarda 484 nəfər minaaxtaran mütəxəssis və 118 nəfər yardımçı heyət, həmçinin 6 mexaniki minatəmizləmə maşını və 36 minaaxtaran it iştirak edir.
İndiyədək cəmi 248,496,902 kvadratmetr ərazi təmizlənib. Tapılıb zərərsizləşdirilmiş mina və PHS-lərin sayı 688,633-dür.
Agentlik tərəfindən təmizləmə əməliyyatları Ağdam, Ağstafa, Ağcabədi, Füzuli, Gəncə, Qəbələ, Xocavənd, Tərtər, eyni zamanda, Bakının Qaradağ rayonunun Güzdək qəsəbəsində davam etdirilir.