Azərbaycan, Bakı, 24 sentyabr /Trend, müxbir İlhamə İsabalayeva/
Azərbaycan Səhiyyə Nazirliyi Ebola virusu ilə əlaqədar sərhədlərdə xüsusi apartların quraşdırılması üçün Dövlət Gömrük Komitəsinə müraciət edib. Bu barədə Trend-ə Səhiyyə Nazirliyindən məlumat verilib.
Nazirlikdən bildirilib ki, bu aparatlar-termovizorlar insanda hərarəti ölçür: "Bu aparat müəyyən edəcək ki, insanda qızdırma var, ya yox. Qızdırmanın olub-olmaması artıq insanda müəyyən infeksiyaların, patologiyaların olması şübhəsini yaradır. Ondan sonra isə həkimlər nəzarət etməlidirlər ki, bu simptomların hansı xəstəliyə daha çox oxşarı var".
SN-dən deyilib ki, H5N1 virusunun yayıldığı dövrdə də Azərbaycanın sərhədlərində Dövlət Gömrük Komitəsi tərəfindən termovizorlar quraşdırılıb: "Bizdə olan məlumata görə, artıq komitə tərəfindən aparatların quraşdırılması istiqamətində işlər görülür. Bizim üçün əsas məsələ Afrika ölkələrindən gələn insanların yoluxub-yoluxmamasıdır. Hər hansı şübhəli hal aşkarlanarsa, bu barədə Səhiyyə Nazirliyinə məlumat veriləcək".
Nazirlikdən qeyd edilib ki, Azərbaycanda indiyə qədər heç kəs Ebola virusuna yoluxmaqda şübhəli bilinməyib.
Qeyd edək ki, Qərbi Afrika ölkələrində, xüsusilə Liberiya, Syerra-Leone və Qvineyada Ebola virusundan ölənlərin sayı 2900-dən çoxdur. Bu virus insana tər, qan, tüpürcək yolu ilə keçir. Xəstəliyin simptomları qızdırma, baş ağrısı, qusma və ishaldır.
