Azərbaycan, Bakı, 17 noyabr /Trend/
Vergilər Nazirliyi Tələbə Qəbulu üzrə Dövlət Komissiyası (TQDK) ilə birgə noyabr ayının 16-da Bakı Dövlət Universitetinin inzibati binasında "Dövlət vergi orqanlarına işə qəbul olunmaq üçün namizədlərin müsabiqəsinin keçirilməsi haqqında" Əsasnaməyə müvafiq olaraq vergi orqanlarına işə qəbul olunmaq istəyən namizədlər üçün test imtahanı keçirmişdir.
Nazirlikdən Trend-ə verilən məlumata görə, test imtahanında iştirak etmək üçün elektron ərizə ilə müraciət edən 1936 nəfərdən 1717-nin sənədləri qəbul olunmuş, imtahanda 1373 nəfər iştirak etmişdir. 3 saat davam edən test imtahanı zamanı namizədlər Vergilər Nazirliyinin müvafiq test bankından seçilmiş hüquq və ixtisas sahələri üzrə 80, informatika və məntiq üzrə isə TQDK tərəfindən tərtib olunmuş 20, cəmi 100 sualı cavablandırmışlar. İmtahanda iştirak edən namizədlərdən 288 nəfəri müsabiqə şərtini ödəyərək - 70 və daha yüksək bal toplayaraq növbəti mərhələyə - müsahibəyə buraxılmışdır.
Növbəti mərhələdə namizədlər Vergilər Nazirliyinin müsabiqə komissiyası tərəfindən təşkil olunan müsahibədən keçməlidirlər. Bu mərhələdən də uğurla keçənlər namizədlər vergi orqanlarında işlə təmin olunmaq imkanı əldə edəcəklər. Müsahibənin dəqiq vaxtı və nəticələri barədə Vergilər Nazirliyinin rəsmi internet saytında (www.taxes.gov.az) və kütləvi informasiya vasitələrində məlumat veriləcəkdir.
İndiyədək keçirilmiş 9 müsabiqə nəticəsində vergi xidmətinə 1000 nəfərdən çox gənc işə qəbul olunmuşdur.