Bakı. Samir Əli - Trend:
Ötən il noyabr ayında Nardaranda hüquq-mühafizə orqanları əməkdaşlarının keçirdiyi əməliyyat zamanı həbs edilən, "Müşəlman Birliyi" adlı təşkilatın rəhbəri Taleh Bağırzadənin barəsində seçilmiş həbs-qətimkan tədbirinin müddəti artırılıb. Trend-in məlumatına görə, bu barədə T. Bağırzadənin vəkil Cavad Cavadov bildirib.
Vəkil qeyd edib ki, Nəsimi rayon Məhkəməsinin qərarı ilə T. Bağırzadənin həbs müddəti 3 ay uzadılıb. Qərarla razılaşmayan T. Bağırzadə məhkəmə qərarından apelyasiya şikayəti verəcək.
Qeyd edək ki, T.Bağırzadə noyabrın 26-da Nardaran qəsəbəsində polisin keçirdiyi əməliyyat zamanı tutulub. Onun barəsində dörd ay müddətinə həbs qətimkan tədbiri seçilib. T.Bağırzadə Bakı İstintaq təcridxanasında saxlanılır.