Azərbaycanda yeni telekanalların açılması üçün Milli Televiziya və Radio Şurasına tezliklər siyahısı təqdim olunmayıb. Bu məlumatı Trend ə Milli Televiziya və Radio Şurasının sədri Nuşirəvan Məhərrəmli verib. O, bildirib ki, ölkədə problemsiz olaraq yeni telekanalların açılması barədə rabitə və informasiya texnologiyaları naziri Əli Abbasovun səsləndirdiyi fikirlər qeyri-ciddi bəyanatdır.
Qeyd edək ki, rabitə və informasiya texnologiyaları naziri Əli Abbasov bu günlərdə jurnalistlərə açıqlamasında bildirib ki, ölkənin tezlik spektorunda yeni telekanalların açılmasına imkanlar var və bunun üçün heç bir maneələr yoxdur. Nuşirəvan Məhərrəmli isə qeyd edib ki, yeni kanalların açılması məsələsini Teleradio Şurası Radiotezliklər üzrə Dövlət Komissiyasının ildə bir dəfə verdiyi tezliklər siyahısı əsasında tənzimləyir. Belə ki, qanuna görə, müvafiq dövlət və icra orqanı, konkret olaraq Radiotezliklər üzrə Dövlət komissiyası və Rabitə və İnformasiya Texnologiyaları Nazirliyi ildə bir dəfə boş qalan və istifadəsi planlaşdırılan tezliklərin siyahısını Teleradio Şurasına təqdim edir. Teleradio Şurası da həmin tezliklərin siyahısını mətbuatda dərc etdirir. Bundan sonra yeni teleradio kanallarının açılması üçün müsabiqə elan olunur.
Amma N.Məhərrəmlinin sözlərinə görə, indiyədək Şuraya belə bir siyahı göndərilməyib: "Əli Abbasoy qoy əvvəlcə bu siyahını mənə göndərsin, sonra həmin tezliklərdə yeni telekanallar açılsın"-deyə Şura sədri bildirib. N.Məhərrəmli onu da deyib ki, yeni telekanalların açılması üçün çoxlu müraciətlər edilir, lakin Şura qərara alıb ki, hələlik hazırda fəaliyyət göstərən telekanalların hüquqi məsələlərini həll etsin. Bundan sonra digər məsələlərin həllinə başlanılsın.
