Azərbaycan Respublikası Ədliyyə Nazirliyi yaxın zamanda Avropa Şurası ilə birgə 4 layihə həyata keçirəcək. Bu barədə Trend ə Azərbaycanın İnsan Hüquqları üzrə Müvəkkili (Ombudsman) Elmira Süleymanova məlumat verib.
O bildirib ki, Ədliyyə Nazirliyi Baş İdarəsi ölkədə penitensiar sistemin yaxşılaşdırılması istiqamətində Avropa Şurası ilə birgə həyata keçirəcəyi layihələrdə Ombudsman Aparatı da iştirak edəcək. E.Süleymanovanın sözlərinə görə, həmin tədbirlərin təşkilinə yaxın zamanda başlanılacaq. Ombudsman qeyd edib ki, Ədliyyə Nazirliy tərəfindən həyata keçirilən digər bir təqdirəlayiq tədbir ictimai nəzarətin təşkil edilməsidir: "Hətta bu haqda Əsasnamə də qəbul oluna bilər. Dövlət və qeyri-hökumət nümayəndələri, Ombudsman Aparatının təmsilçiləri müntəzəm şəkildə həbsxanalarda monitorinqlər keçirəcəklər. Bu sahədə mümkün qədər, qanun və səlahiyyətlər çərçivəsində şəffaflıq gözlənilir. Məhbuslara öz hüquqlarından istifadə etməyə də imkanlar yaradılır"-deyə ombudsman qeyd edib.
E.Süleymanova avqustun 19-da Qobustan həbsxanasında monitorinq apardığını, orada məhbuslarla, həkimlərlə görüşdüyünü, kameralara, xəstəxanaya baxış keçirdiyini bildirib. Qobustanda tikilmiş xəstəxananın hazırda tam istifadəyə verildiyini deyən E.Süleymanova həkimlərdə olan dərmanların siyahısını da yoxladığını da diqqətə çatdırıb. Onun sözlərinə görə, həbsxanalar nə qədər təkmilləşsə də, yenə bu işin davam etdirilməsinə ehtiyac var: "Amma bu da bir həqiqətdir ki, son vaxtlar həbsxanalarda vəziyyət xeyli təkmilləşib. Ümumiyyətlə, cəzaçəkmə müəssisələrində daim monitorinqlər aparılır. Xaricdən gələn qonaqları həbsxanalarla tanış olmaq üçün aparırıq. Penitensiar sistemdə aparılan islahatlar davam etdirilir. Bizə müracit edən və etməyən məhbusların hüquqları daim bizim diqqətimizdədir. Məhbuslar Konstitusiya ilə təsbit ounmuş hüquqlardan istifadə etməlidirlər, yalnız məhkəmə qərarı ilə qoyulmuş məhdudiyyətlərdən başqa".
