Azərbaycanda Avropa Şurası ekspertlərinin köməyi ilə hakimlər üçün "Etik Davranış Kodeksi" hazırlanır. Bu barədə Trend ə Azərbaycan Respublikası Ədliyyə Nazirliyinin mətbuat xidmətindən məlumat verilib.
Məhkəmə etikası üzrə yaradılmış Azərbaycan-Avropa Şurası işçi qrupu Kodeksin
yeni layihəsini müzakirə edib. Müzakirələrdə Avropa Şurasının ekspertləri layihənin yüksək səviyyədə hazırlandığını qeyd edərək hakimlərin məsuliyyət hissinin artırılmasına, onların peşəkar etika məsələlərinin tənzimlənməsinə bu sənədin müsbət təsir göstərəcəyini vurğulayıblar, onun təkmilləşdirilməsi ilə bağlı təklif və tövsiyələrini bildiriblər.
"Hakimlərin Etik Davranış Kodeksi" 2007-ci ilin əvvəlində hazır olacaq.
Avropa Şurasının ekspertləri 1 oktyabr 2006-cı il tarixdə hakimliyə namizədlərlə keçirilən test imtahanının təşkilini də yüksək qiymətləndirirlər. Ekspertlər bu imtahanları Azərbaycanda məhkəmə sisteminin və ədliyyə orqanlarının inkişafı məqsədi ilə həyata keçirilən tədbirlər sırasında ən önəmli olduğunu qeyd edirlər.
