Azərbaycan, Bakı / Trend müxbir . E.Hüseyni/ Bakı şəhərinin bəzi ərazilərində sürüşmə təhlükəsi artmaqdadır və problem həllini tapmır. Bu barədə Azərbaycan Milli Elmlər Akademiyasının (AMEA) Geologiya İnstitutun mətbuat xidmətindən məlumat verilib. Sürüşmə təhlükəsinin artması əsasən təbiət və texnogen amillərin təsiri ilə bağlıdır. Məlumata görə, Bayıl yamacından tutmuş Şəhidlər Xiyabanına qədər olan ərazi və 9-cu mikrorayon paytaxtımızda sürüşmənin ən fəal olduğu ərazilərdir. Sürüşmənin inkişaf etdiyi yerlər isə İsmayıl Qutqaşınlı küçəsi ilə (keçmiş 2-ci Xrebtovı küçəsi) Hüsü Hacıyev küçəsi arasında olan və "Dağlı məhəlləsi" deyilən sahə, Əhmədli qəsəbəsində General Şıxlinski küçəsindən tutmuş Ukrayna dairəsi və Gəncə prospekti də daxil olmaqla Xəzərin sahilinə qədər olan ərazi, Yeni Günəşli, Zığ, Qaraçuxur, Bülbülə gölünün Bakıxanov qəsəbəsinə (keçmiş Razin) tərəf hissəsi, eləcə də 9-cu mikrorayondakı Bakı dairəsidir. Bu cür təhlükə Binəqədidə də mövcuddur. Bundan əlavə, Salyan Kazarması ilə Mətbuat prospekti arasında olan ərazidə, xüsusən də Alatavada oturma prosesi müşahidə edilir. Çünki, bu ərazidə qrunt suları yer səthinə çox yaxındır. Məlumatda o da bildirilib ki, hazırda Badamdardakı binaların 60-70 faizi, Bayıl yamacındakıların isə 100 faizi ən ciddi təhlükə altındadır.
...
