Azərbaycan, Bakı, 18 noyabr /Trend, müxbir İlkin İzzət/
Silahlı Qüvvələrin voleybol üzrə birinciliyi başlayıb.
Müdafiə Nazirliyinin mətbuat xidmətindən Trend-ə bildiriblər ki, noyabrın 18-də Heydər Əliyev adına Azərbaycan Ali Hərbi Məktəbinin idman zalında Silahlı Qüvvələrin voleybol üzrə birinciliyinə start verilib.
Turnirdə müxtəlif qoşun növlərini, ayrı-ayrı hərbi hissə və tədris müəssisələrini təmsil edən 13 komanda medallar uğrunda mübarizə aparırlar.
Yarışları beynəlxalq dərəcəli hakim Eldar Əliyevin rəhbərlik etdiyi hakimlər briqadası idarə edir.
Təntənəli açılış mərasimində çıxış edən Müdafiə Nazirliyinin Fiziki hazırlıq və idman bölməsinin rəisi polkovnik-leytenant Sadiq Paşayev müdafiə naziri general-polkovnik Zakir Həsənovun adından yarış iştirakçılarına uğurlar arzulayıb və daha güclülərin qalib gəlməsini diləyib.
Mərasimdə Müdafiə Nazirliyinin Fiziki hazırlıq və idman bölməsinin keçmiş rəisi, avtomobil qəzasında dünyasını dəyişmiş polkovnik-leytenant Eldar Məmmədovun xatirəsi ehtiramla anılıb və mərhumun oğluna hədiyyə təqdim olunub.
Silahlı Qüvvələrin voleybol üzrə birinciliyi noyabrın 22-dək davam edəcək. Turnirin qaliblərinə medallar, fəxri fərman və diplomlar təqdim olunacaq.