Bakı. Trend:
"Bakı Metropoliteni" QSC ilə İstanbul Metropoliteni arasında gələcəkdə böyük layihələr icra ediləcək.
Trend-in məlumatına görə, bu barədə noyabrın 5-də Bakı metropoliteninin yaranmasının 55-ci ildönümü münasibətilə keçirilən tədbirdə jurnalistlərə açıqlama verən İstanbul metropoliteninin baş direktoru Özgür Soy bildirib.
O qeyd edib ki, hazırda Bakı metropoliteni ilə müxtəlif sahələrdə əməkdaşlıq edilir: "Bakı metropoliteni ilə çox yaxşı bir əməkdaşlığımız var, birlikdə bir neçə layihəyə imza atırıq. Siqnalizasiya sistemləri, yeni vaqonların və digər maşın-mexanizm sistemlərinin dəyişdirilməsi, inşaat və başqa sahələrdə əməkdaşlıq edirik. Həm öz təcrübələrimizi bölüşürük, həm də Bakı metropoliteninin təcrübələrindən faydalanırıq. Bizim apardığımız Ar-Ge araşdırmaları var. O araşdırmalarla bağlı danışıqlar aparırıq. Azərbaycan dövlətinin planlarına bağlı olaraq hər cür əməkdaşlığa açığıq. Hazırda Bakı metropoliteni ilə qarşılıqlı təlimlər həyata keçiririk və təcrübələrimizi paylaşırıq. Gələcəkdə mütləq daha böyük layihələrimiz olacaq".