Bakı. Trend:
Azərbaycan iqlim dəyişikliyi ilə mübarizə və milli məqsədlərə nail olmaq üçün səylərə tam sadiqdir.
Trend xəbər verir ki, bunu Azərbaycanın ekologiya və təbii sərvətlər nazirinin müavini Umayra Tağıyeva COP29 çərçivəsində milli bəyanatla çıxışı zamanı bildirib.
U.Tağıyeva Azərbaycanın iqlim məqsədləri haqqında məlumat verib. Bu məqsədlər 2050-ci ilə qədər istixana qazı emissiyalarının 1990-cı ilin səviyyəsi ilə müqayisədə 40 faiz azaldılmasını ehtiva edir.
"Ölkə 2030-cu ilə qədər elektrik enerjisinin istehsalı üzrə ümumi gücündə bərpa olunan enerji mənbələrinin payını 30 faizə çatdırmağı hədəfləyir ki, bu da qlobal istiləşmənin 1,5°C ilə məhdudlaşdırılması istiqamətindəki qlobal səylərə uyğundur", – deyə o qeyd edib.
Azərbaycan enerji sektorunda Qarabağ, Şərqi Zəngəzur və Naxçıvanda yaşıl enerji zonaları yaradaraq mühüm addımlar atıb. Bu zonalar enerji sektorunda emissiyaların azaldılmasına töhfə verəcək.
"Qarabağ, Şərqi Zəngəzur və Naxçıvanda yaradılan yaşıl enerji zonaları xüsusilə enerji sektorunda emissiyaların azaldılmasına kömək edəcək", – deyə U.Tağıyeva bildirib.
Nazir müavini həmçinin yenilənmiş milli töhfələr (NDC 3.0) haqqında məlumat verib. Bu sənəddə əsas sahələrdə emissiyaların azaldılması üzrə detallı strategiyalar yer alacaq.
"Biz yenilənmiş NDC 3.0 çərçivəsində hədəflərimizi nəzərdən keçiririk. Yeni sənəd əsas sahələrdə emissiyaların azaldılması üzrə strategiyalar ehtiva edəcək ki, bu da gələcəkdə karbon neytrallığına nail olmaq üçün öhdəliklərimizi gücləndirəcək", – deyə o bildirib.
Azərbaycanın iqlim məqsədləri ölkənin sosial-iqtisadi inkişaf strategiyasına inteqrasiya edilib.
"Təmiz ətraf mühit və yaşıl inkişaf 2030-cu ilə qədər Azərbaycanın milli sosial-iqtisadi inkişaf prioritetlərindən biridir", – deyə U.Tağıyeva vurğulayıb.
O, əlavə edib ki, 2022-2026-cı illər üçün sosial-iqtisadi inkişaf strategiyası istixana qazı emissiyalarının azaldılmasını hədəfləyir.
Şəffaflıq Azərbaycanın iqlim strategiyasının əsas prinsipi olaraq qalır. Ölkə Ikiillik Şəffaflıq Hesabatını (BTR) hazırlayaraq əldə edilmiş irəliləyişlər barədə dəqiq və etibarlı məlumat təqdim edib.
"Şəffaflıq bizim iqlim sahəsindəki fəaliyyət strategiyamızın əsas tərkib hissəsidir. Bu hesabat Azərbaycanın beynəlxalq iqlim razılaşmalarına bağlılığını təsdiqləyir və hesabatlılıq və inamın artırılmasına töhfə verir ", – deyə U.Tağıyeva bildirib.
O, Azərbaycanın iqlim dəyişikliyinin təsirlərinə qarşı həssaslığını vurğulayaraq adaptasiya tədbirlərinin əhəmiyyətinə diqqət çəkib. Ölkədə kənd təsərrüfatı, su və sahil zonalarının idarə edilməsi, həmçinin təbii fəlakət risklərinin azaldılması üzrə strategiyaları əhatə edən Milli Adaptasiya Planı hazırlanıb.
"Bizim Milli Adaptasiya Planımız əsas problemlərin, o cümlədən kənd təsərrüfatı, su resursları və sahil zonalarında həlli və təbii fəlakət risklərinin azaldılması üçün kompleks strategiyaları ehtiva edir", – deyə o qeyd edib.
"Azərbaycan əhəmiyyətli irəliləyişlər əldə etsə də, başa düşürük ki, bu, qlobal problem olaraq qlobal həll yolları tələb edir", – deyə Tağıyeva bildirib və iqlim dəyişikliyi ilə mübarizə səylərini sürətləndirmək üçün adekvat maliyyə dəstəyi və texnologiya transferinin vacibliyini vurğulayıb.
Qeyd edək ki, noyabrın 11-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.