Bakı. Trend:
COP29 çərçivəsində iqlim koalisiyalarının yaradılması üzrə işlər görülür.
Trend xəbər verir ki, bu barədə Almaniyanın xarici işlər naziri Annalena Berbok “X” sosial şəbəkəsində paylaşım edib.
"İqlim böhranı dövrümüzün təhlükəsizliyi üçün ən böyük təhdididir. O, sərhəd tanımır və seçki müddətlərinə məhəl qoymur. Hər bir onluq dərəcə vacibdir. Qlobal istiləşməni 1,5 dərəcə həddində saxlamaq üçün əlimizdən gələni etməli olduğumuzu bilirik", – deyə nazir yazıb.
O, COP29 çərçivəsində dünya ictimaiyyətinin sıx əməkdaşlığını təmin etməyin əhəmiyyətini vurğulayıb.
"Biz Bakıda müxtəlif qitələrdən ölkələri birləşdirən iqlim koalisiyalarının yaradılması üzərində işləyirik. Yalnız birlikdə biz irəliləyişə nail ola bilərik", – deyə Annalena Berbok əlavə edib.
Nazir həmçinin Almaniya və Avropanın qlobal miqyasda iqlim dayanıqlığına keçidin maliyyələşdirilməsində etibarlı tərəfdaş olaraq qalacağını təsdiqləyib.
"Bununla yanaşı, yeni iri emissiya mənbələri də məsuliyyət götürməlidir: həm istixana qazı emissiyalarının azaldılmasında, həm də iqlim maliyyələşdirilməsində", – deyə o qeyd edib.
Qeyd edək ki, noyabrın 11-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) açılışı olub.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.