Bakı. Trend:
Dövlət borcuna xidmət xərclərinin növbəti ildə 2,458 milyard manat olacağı, faiz ödənişlərinin isə 1,381 milyard manat olmaqla bu xərclərin 56,2%-ni təşkil edəcəyi proqnozlaşdırılır.
Trend-in məlumatına görə, bu məsələ Milli Məclisin İqtisadi siyasət, sənaye və sahibkarlıq komitəsinin bugünkü iclasında müzakirə olunan Azərbaycan Respublikasının 2026-cı il dövlət büdcəsinin layihəsinə Azərbaycan Respublikası Hesablama Palatasının rəyində öz əksini tapıb.
“Daxili borcun yenidən maliyyələşdirilməsi faiz xərclərinə təsir göstərə bilər. Xarici borcun valyuta strukturunun yüksək dərəcədə dollar asılılığı (hazırda 85,2%) və ümumi borcun təqribən yarısının dəyişkən faizli olması şəraitində valyutaya tələbin artması və qlobal maliyyə bazarlarında faiz dərəcələrinin artması xarici borca xidmət xərclərinə artırıcı təsir göstərə bilər”, - məlumatda vurğulanıb.
Eyni zamanda bildirilib ki, daxili bazarda yerləşdirilmiş 7,942
milyard manat dəyərində dövlət qiymətli
kağızlarının 68%-nin və ya 5,4 milyard manatının qısamüddətli (1–3
illik) istiqrazlardan ibarət olması
ortamüddətli dövrdə dövlət büdcəsi və Təminat Fondunun vəsaitləri
hesabına xidmət göstərilməsi
mümkün olmayan öhdəliklərin yenidən maliyyələşdirilməsini
şərtləndirir.
"Bu isə daxili maliyyə bazarlarında dövlət qiymətli kağızlarına
investisiya üçün tələb olunan yetərli likvidliyin təmin olunmaması
istiqamətində risklərin mövcudluğunu göstərir. Qeyd edək ki, cari
ildə qısamüddətli
borcların uzunmüddətl borclarla əvəzlənməsi tendensiyası müşahidə
olunur ki, bu da müvafiq riskin
yumşaldılmasına xidmət edir", - məlumatda qeyd edilib.