Azərbaycan, Bakı / Trend / Palmali şirkətlər qrupuna daxil olan və azərbaycanlı iş adamı Mübariz Mənsimova məxsus Pal Media genişlənməkdə davam edir. Cari ilin noyabr ayının 1-də şirkət yeni radiostansiya - Türkiyənin ilk özəl kanalı olan Istanbul FM-in alınmasına dair müqavilə imzalayıb. Pal Media-nın baş direktoru İbrahim Nəbioğlunun sözlərinə görə, 1993-cü ildən fəaliyyət göstərən, Tünkiyənin populyar kanallarından biri olan radiostansiyasının alınması şirkətin bu sektorda məqsədyönlü siyasətinə sübutdur.
Bu addım Türkiyədə böyük rezonansa səbəb olub, belə ki, Istanbul FM öz proqramlarını bütün ölkə ərazisinə yayımlayır və aparıcı media strukturları ilə rəqabət aparır. Bu artıq Pal Media-nın ikinci (Türkiyədə 99.2 dalğasında artıq Pal FM kanalı yayımlanır), Türkiyədə azərbaycanlıların təsis etdiyi birinci radiostansiyadır.
Lakin Pal Media bu layihə ilə kifayətlənmir: noyabrın sonunadək şirkət yeni xəbər portalı, 2008-ci ildə isə, televiziya kanalı açacaq. 2007-ci ildə Palmali şirkəti tərəfindən Türkiyə media-sektoruna yatırılan sərmayə 20 mln. dolları ötüb.