Azərbaycan, Bakı, 08 aprel / Trend , müxbir İ.Xəlilova/ ABŞ-ın Beynəlxalq İnkişaf Agentliyi (USAID) 2009-10-cu illərdə Azərbaycan üçün maliyyə yardımının artırılması və ya onun 2008-ci il büdcəsi səviyyəsində saxlanılması barədə Amerika hökumətinə müraciət göndərib. Bu barədə Azərbaycanın USAID-dəki koordinatoru Skott Teylor bildirib. Cari ildə sosial-iqtisadiyyat sahəsində layihələrin reallaşdırılmasına 16 mln. dollar vəsait ayrılıb. Ötən il Amerikanın bu istiqamətdə yardımı 23 mln. dollar səviyyəsində olub.
"USAID-in Azərbaycana maliyyə yardımı ildən-ilə azalır, lakin bu, Azərbaycan və ABŞ arasında qarşılıqlı münasibətlərə təsir göstərmir" - deyə Teylor vurğulayıb.
Onun sözlərinə görə, iqtisadi əməkdaşlıq üzrə birgə hökumətlərarası komissiya bazar şərtləri və demokratiyaya müvafiq olaraq sosial-iqtisadi sahənin inkişafı məqsədi ilə maliyyələşdirmə imkanlarını müzakirə edir. O, Azərbaycan üçün maliyyə yardımı həcminin azalmasının əsas səbəbi kimi İraq və Əfqanıstandakı hərbi fəaliyyətləri görür. İkinci səbəb ölkənin artan neft gəlirləri və Azərbaycanın varlı ölkəyə çevrilməsi ilə əlaqədardır.
USAID əlaqələndiricisi bildirib ki, Azərbaycan hökuməti əməkdaşlığın genişləndirilməsi üçün layihələrin birgə maliyyələşdirilməsi təşəbbüsü ilə çıxış edib. Onun fikrincə, Amerikanın layhələrin birgə maliyyələşdirilməsi üzrə yardım büdcəsinə sosial-iqtisadi sahədə baş verən proseslər və seçkilərin nəticələri təsir edir.
Müəlliflə əlaqə saxlamaq üçün elektron ünvan: capital
