Azərbayacn, Bakı, 22 iyul/ Trend , müxbir İ.Xəlilova/ Azərbaycan Vergilər Nazirliyində artıq üçüncü bank - "AZFİNANSBANK" Açıq Səhmdar Cəmiyyəti qeydiyyatdan keçib, - çərşənbə axşamı nazirlikdən deyiblər. 2008-ci il ərzində Vergilər Nazirliyinin tətbiq etdiyi "Vahid pəncərə"sistemində artıq "Naxçıvanbank"ASC və "CP Bank" qeydiyyatdan keçib.
Yeni bank 10 mil. manat Nizamnamə kapitalı ilə yaradılıb. Bankın hüquqi ünvanı: AZ1073, Yasamal rayonu, İsmayılbəy Qutqaşenli küç., ev 112.
"Naxçıvanbank"və"CP Bank" da müvafiq olaraq 10 və 11 mln. manat Nizamnamə fondu ilə ölkənin bank bazarına daxildir. Bu banklar artıq Azərbaycan Milli Bankında ilk lisenziya mərhələsindən keçiblər.
Yeni bankların daxil olması ilə bərabər, ölkə bank bazarında rəqabətə dözməyən, bank qanunvericiliyinə və AMB-nin prudensial normalarına əməl etməyən 10 ildən çox fəaliyyət göstərən banklar da var. İyulun əvvəlində Milli Bankın İdarə Heyəti Atlantbank ASC və Poctbank ASC-dən bank fəaliyyətinin həyata keçirilməsi üzrə lisenziyanın geri alınması barədə qərar qəbul edib. Nəticədə Azərbaycanda fəaliyyət göstərən bank təşkilatlarının sayı 44-ə enib.
Bu tədbirlər ölkə bank sisteminin yenidən qurulması, maliyyə stabilliyinin təmin edilməsi və maliyyə vasitəçiliyinin effektivliyinin artırılması çərçivəsində keçirilir.
Iyulun 22-də rəsmi valyuta məzənnəsi 0,8048 AZN/USD-dır.
