Azərbaycan, Bakı, 26 sentyabr / Trend , müxbir N.İsmayılova/ Azərbaycanın bank sektoru dünya maliyyə böhranına məruz qala bilər və bu, onun xarici borclanma dərəcəsindən asılı olacaq, Avropa Yenidənqurma və İnkişaf Bankının (AYİB) Bakı nümayəndəliyinin rəhbəri Frensis Deley (Francis Delaey) Trend -a bildirib.
"Azərbaycan banklarının xarici sərmayələrdən asılılığı dünya iqtisadi böhranının Azərbaycanın bank sahəsinə nə qədər təsir göstərəcəyində əhəmiyyətli rol oynayacaq, - Deley bildirib. - Böhran hər banka müxtəlif cür təsir edə bilər - bu, həmin bankın xarici sərmayələrdən nə dərəcədə asılı olması ilə bağlıdır".
O qeyd edib ki, Azərbaycan bankları əsasən AYİB, Beynəlxalq Maliyyə Korporasiyası, Asiya İnkişaf Bankı və sair bu kimi beynəlxalq maliyyə institutlarından kreditlər cəlb edirlər ki, bu da belə təhlükəni azaldır.
Hazırda Azərbaycan banklarının cəlb etdikləri xarici kreditlərin həcmi $2 mlrd.-ı ötür. Lakin son 5 il ərzində ölkənin bank sektoru bütün göstəricilər üzrə 10 dəfə artıb və sektorun "maliyyə dərinliyi" 18 faizdən 60 faizə yüksəlib.
2008-ci ilin əvvəlində ölkə bankları $1,152 mlrd. xarici kredit cəlb ediblər. Azərbaycan Milli Bankı belə borclanmaları tənzimləmək məqsədilə aprelin 1-dən xarici kreditlər üzrə cəlb edilən məbləğin 5 faizi səviyyəsində icbari ehtiyatların yaradılmasını tətbiq edib.
AMB gələcəkdə ölkə banklarında korporativ idarəetmə standartlarının tətbiqinə xüsusi diqqət ayırmaq niyyətindədir. "Bank sektorunun əsas inkişaf istiqamətlərindən biri korporativ idarəetmə standartlarının tətbiqi və bank işində şəffaflığın artırılmasıdır, - AMB İdarə Heyətinin sədri Elman Rüstəmov bir müddət əvvəl bildirib. Hazırda bankların aktivlərinin 90 faizdən çox hissəsi auditdən keçir".
Bundan əlavə, parlamentin yaz sessiyasında çirkli pulların yuyulması haqqında qanunun qəbul ediləcəyi gözlənilir. Bu, banklara etibarı artıracaq, dövlət payının olduğu bankların (Beynəlxalq Bank və gələcəkdə kredit təşkilatından transformasiyadan sonra kənd təsərrüfatı bankında) özəlləşdirilməsi üzrə iş davam etdiriləcək.
Amerikadakı maliyyə böhranı nəticəsində dünyada baş verən hadisələr fonunda AMB-nin başlıca vəzifələrindən biri ölkənin bank sektorunda nəzarətin gücləndirilməsidir.
Ötən həftə fond birjalarında aparılan sövdələşmələr aparıcı indekslərin son üç ildə ən aşağı minimal səviyyəsində qeydə alınıb. Dow Jones indeksi dörd faizdən çox, Nasdaq isə təminən beş dəfə azalıb. Bu dövr ərzində özünü daha dözümlü göstərmiş Morgan Stanley bankının səhmləri 24,2 faiz azalıb ki, bu da 1998-ci ildən bəri ən güclü azalma hesab edilir. Morgan Stanley, ötən həftə iflasa uğramasını bəyan edən Lehman Brothers-in taleyini yaşamamaq üçün Wachovia bankı ilə birləşmək üzrə danışıqlara başlayıb. Lehman Brothers böyüklüyünə görə Amerikanın dördüncü bankı sayılır. Birləşməyə digər namizədlər Britaniyanın HSBC, İspaniyanın Santader, Yaponiyanın Nomura Holdings bankları və Çinin CITIC Securities broker şirkətidir.
Amerika böhranının dalğası bütün dünyanı bürüyüb. ABŞ-dakı iqtisadi böhran Rusiyanın fond bazarlarına güclü zərbə vurub. Rusiya birjalarında səhmlərin ucuzlaşması nəticəsində, Rusiyanın maliyyə bazarları üzrə Federal Xidmətinin tapşırığına əsasən, RTS və MBVB fond birjalarında sövdələşmələr dayandırılıb.
Analitiklər hesab edirlər ki, bazarda vəziyyətin düzəlməsi üçün pul bazarındakı likvidlik böhranını dəf etmək lazımdır.
Dünya maliyyə bazarlarında cərəyan edən hadisələr müxtəlif ölkələrin Mərkəzi Banklarını onlara üz verən böhranın aradan qaldırılması üzrə tədbirlər görməyə vadar edir. Belə ki, ABŞ-ın Federal Ehtiyat Sistemi, Mərkəzi Avropa Bankı, Yaponiya Bankı və İngiltərə Bankı bazarlarda gərginliyin zəiflədilməsi üçün birgə fəaliyyət haqqında bəyan ediblər.
Müəlliflə əlaqə saxlamaq üçün elektron ünvan: [email protected]
