Azərbaycan, Bakı, 17 noyabr/ Trend / Dövlət Statistika Komitəsinin məlumatına əsasən, 2008 - ci ilin yanvar - oktyabrında Azərbaycanın nəqliyyat sektoru 149,7 mln. ton müxtəlif yük daşıyıb ki, bu da 2007- ci ilin yanvar - oktyabrından 10,4 faiz çoxdur.
Daşınmış yüklərin ümumi həcminin 69,1 faizi özəl sektorun payına düşüb. Yanvar - oktyabrda daşınmış yüklərin 47 faizi avtomobil nəqliyyatı, 31,2 faizi boru kəmərləri, 15,3 faizi dəmir yolu, 6,5 faizi dəniz nəqliyyatının payına düüşr.
Yanvar - oktyabrda sərnişin nəqliyyatı tərəfindən 1 mlrd. nəfər daşınıb ki, bu da 2007 - ci ilin yanvar - oktyabrından 7,9 faiz çoxdur. Sərnişin daşınmalarının 83,4 faizi özəl sektorun payına düşür. Sərnişinlərin əsas hissəsi avtomobil nəqliyyatı (83,5 faiz) və metro (15,9 faiz) ilə daşınıb.
Dəmir yolu nəqliyyatı 22,9 mln. ton müxtəlif yük daşıyıb ki, bu da təxminən 2007- ci ilin yanvar- oktyabrı üzrə göstəricidən 1,4 faiz azdır.
Dəniz nəqliyyatı 9,7 mln. ton müxtəlif yük daşıyıb. Bu, 2007- ci ilin yanvar - oktyabrından 14,3 faiz çoxdur. Daşınan yüklərin 69,1 faizi neft və neft məhsulları, qalan hissəsi - 30,9 faizi quru yüklərin payına düşür. Daşınmış yüklərin bütün həcmi beynəlxalq əməliyyatların payına düşür.
Yanvar - oktyabrda Azərbaycanın limanlarında emal edilmiş yük həcmi 4,5 mln. ton təşkil edib. Bu, 2007 - ci ilin yanvar - oktyabrından 1 faiz azdır.
Avtomobil nəqliyyatı 70,3 mln. ton - 2007- ci ilin yanvar- oktyabrından 7,4 faiz çox yük daşıyıb. Sərnişin daşınmalarının həcmi 851,3 mln. nəfər olub (6,9 faiz artıb). Sərnişinlərin 96,7 faizi avtobuslar, 3,3 faizi minik avtomobilləri ilə daşınıb.
Metropoliten tərəfindən sərnişin daşınmalarının həcmi 162,3 mln. nəfər olub və 13,9 faiz artıb.
Hava nəqliyyatı ilə sərnişin daşınmaları 9,6 faiz azalıb və 1,2 mln. nəfər olub. Bu növ sərnişin daşınmalarının 7,2 faizi qeyri - dövlət sektorunun payına düşür.
Magistral neft kəmərləri ilə 37,7 mln. ton neft nəql edilib. Bunun dörddə üçü Bakı -Tbilisi -Ceyhan boru kəmərinin payına düşür. 2008 - ci ilin yanvar - oktyabrı ərzində Bakıdan 28 mln. ton neft göndərilib. Magistral neft kəmərləri ilə nəql edilmiş ümumi həcm, ötən ilin analoji dövrü ilə müqayisədə, 15,6 faiz artıb.
Ötən ilin yanvar - oktyabrında magistral qaz kəmərləri ilə 9,1 mlrd. kubmetr qaz nəql edilib. Bu göstərici ötən ilin eyni dövründən 58,3 faiz çoxdur. Cənubi Qafqaz qaz kəməri ilə 3,9 mlrd. kubmetr qaz (ümumi həcmin 29,4 faizi) nəql edilib.
2008 - ci ilin yanvar - sentyabrında Avrasiya nəqliyyat dəhlizi ilə Azərbaycan ərazisindən 35,6 mln. ton yük daşınıb ki, bu da 2007- ci ilin analoji dövrünün göstəricisindən 2,4 faiz çoxdur. Bu dəhliz üzrə sərnişin daşınmaları 142,2 mln. nəfərə bərabər olub (2007- ci ilin yanvar - sentyabrından 6,4 faiz çox). Daşınmalardan əldə edilən gəlir 195 mln. manat təşkil edib ki, bu da 2007- ci ilin yanvar - sentyabrından 12,5 faiz çoxdur.