Azərbaycan, Şəki, 27 dekabr/ Trend , müxbir S.Fətəliyev/ "Şəkidə Azərbaycanın şimal - qərb regionunda ən böyük şərab zavodu tikilib. Zavodun sahəsi dörd hektardır və müəssisəyə yeddi mln. avro sərmayə yatırılıb", - müəssisənin direktoru Əbdüləli Axundov bildirib.
Yevlax-Balakən magistral yolu yaxınlığında tikilən zavodda 5000 min ton üzüm emal ediləcək.
Müəssisədə İtaliyanın Bella Deffola SPA firmasının müasir avadanlığı quraşdırılıb. Avadanlığın alınmasına 4,9 mln. avro sərf edilib. Zavodda 45-50 nəfər çalışacaq.
Axundovun sözlərinə görə, zavod tam istismara verilməsə də, artıq bu il üzüm qəbuluna başlayıb. Şəki şərabı 2009-cu ilin fevralında satışda olacaq.
Yaxın keçmişdə Şəkidə 50 min ton üzüm emal edən üç zavod fəaliyyət göstərirdi.
"Bu gün regionda üzümçülüyün inkişafına yeni şərait yaranıb. Hazırda Şəkidə 300 ha sahədə üzümlüklər var və yenilərinin salınması üzrə iş aparılır", - Axundov deyib.
Müəlliflə əlaqə saxlamaq üçün elektron ünvan: [email protected]