Azərbaycan, Bakı, 21 yanvar/ Trend , müxbir N.İsmayılova/
Rusiya Reytinq Agentliyinin tərtib etdiyi "Bank likvidliyinin barometri" reytinqinin məlumatlarına əsasən, 2008 - ci il noyabrın 1 - nə olan vəziyyətə görə, Azərbaycan Beynəlxalq Bankının Moskva filialı yüksək likvidli banklar kateqoriyasına daxil olub, - ABB-Moskvanın məlumatında deyilir.
Agentliyin dərc etdiyi reytinq Rusiya bazarında analoqu olmayan yeni törəmə reytinq məhsuludur. O, bankın ödəməqabiliyyətliliyini qiymətləndirən və onun öz öhdəliklərinə cavab vermək qabiliyyətinin səviyyəsini müəyyən etməyə imkan verən göstəricinin üzərində qurulur.
Bank likvidliyinin barometri bankın Rusiya Mərkəzi Bankının saytında dərc olunan hesabatlılığı əsasında hesablanmış ödəmə intizamı səviyyəsinin xarakteristikasıdır və maliyyə sisteminin əhalinin kəskin etibar defistini yaşadığı böhran şəraitində xüsusilə aktualdır.
Rusiya banklarından fərqli olaraq, böhranlı vəziyyət ABB-Moskvaya təsir gstörməyib, - Bankın İdarə Heyətinin sədri Fuad Abdullayev əvvəllər bildirib.
"Bankın əsas strategiyası Azərbaycan və Rusiya arasında ticarət-iqtisadi əlaqələrin inkişaf etdirilməsidir, - Abdullayev bildirib. - Və bu gün aktivlərin böyük hissəsi 60 faizi ticarət sahəsində diversifikasiya edilmiş kredit portfelinin payına düşür".
Hazırda bankın qiymətli kağızlardakı portfeli sıfıra endirilib, kredit portfeli balanslaşdırılıb və Rusiyanın bütün maliyyə sistemi üçün vasitəçi olan ABB-Moskva Vneştorqbank, Qazprombank, Sberbank və digər iri banklarla işləyir.
"2010 - cu ildə aktivlərin, kapitalın, kredit portfelinin ölçüsünə görə, Rusiyanın 100 ən iri bankı sırasına daxil olmağı planlaşdırırıq", - Abdullayev vurğulayıb.
Hazırda bankın aktivləri 10 mlrd. rubl, kapitalı 1 mlrd. rubl, kredit portfeli 6 mlrd. rubl təşkil edir.
2007 - ci ildə bankın aktivlərinin artımı 80 faiz, kredit portfelinin artımı 72 faiz təşkil edib. ABB - Moskva 2008 - ci ili maliyyə göstəricilərinin 50 - 60 faiz artımı ilə başa çatdırıb, gələn il bu rəqəmin 20 faiz səviyyəsində olacağı gözlənilir.
Bu gün bankın Moskva, Moskva əyaləti, Yekaterinburq, Sank-Peterburqda filial şəbəkəsi var.
"Azərbaycan Beynəlxalq Bankı - Moskva" MMC 2002-ci ildə qeydiyyatdan keçib.
Müəllifl əlaqə saxlamaq üçün elektron ünvan: [email protected]