Azərbaycan, Şəki, 02 fevral/ Trend , müxbir X.Əliyeva/ Bu gündən Azərbaycanın şimal-qərb bölgəsi Şəkidə yenidən çörəyin qiymətində 50 faiz artım müşahidə olunub. Çörəyin qiymətinin 20 qəpikdən 30 qəpiyədək qalxmasını satıcılar çəkinin artması ilə izah edirlər.
Satıcıların sözlərinə görə, dünən çəkisi 500 qram olan çörək 20 qəpiyə satılıb, bu gündən isə çörəyin çəkisi 800 qramadək artırılıb. Buna müvafiq olaraq qiymət də 30 qəpiyə qalxıb.
Hazırda Şəkidə unun bir kisəsinin çəkisi növündən asılı olaraq 13-15 manat arası dəyişilir. Satıcıların sözlərinə görə, son vaxtlar unun qiymətində heç bir artım olmayıb.
Şəkinin çörəyə olan gündəlik tələbatı rayonda fəaliyyət göstərən özəl çörəkbişirmə sexləri tərəfindən ödənilir. Çörəyin qiymətindən ciddi narahat olan alıcıların sözlərinə görə, çörək istehsalı ilə məşğul olan sahibkarlar çörəyin qiymətini artırmaq üçün müxtəlif üsullara əl atırlar. Onlar əvvəlcə çörəyin çəkisini 100-200 qram artırır, daha sonra isə buna müvafiq qiymətləri qaldırırlar. Şəhər sakinləri təəssüflə qeyd ediblər ki, çörəyin çəkisinin artması cəmi bir həftə davam edir, bundan sonra isə çəki yenə 200 qrama yaxın azaldılır.
Çörəyin qiymətinin qalxması ilə bağlı daxil olan məlumatlarla əlaqədar olaraq İstehsal Bazarına Nəzarət üzrə Dövlət Xidmətinin Şəki regional idarəsinin əməkdaşları dünəndən monitorinqə başlayıblar. Məlum olub ki, mağazalarda çəkisi 500 qram olan çörəyin qiyməti 20, 750 qram olan çörəyin qiyməti isə 30 qəpik təşkil edir.
Regional idarədən bildiriblər ki, bu gün ölkədə çörəyin qiymətinin tənzimlənməsinə dövlət tərəfindən nəzarət edilmir. Buna baxmayaraq, yerli Standartlaşdırma və Metrologiya İdarəsinin göstərişinə əsasən, çörək istehsalçıları çəkini azalda bilməzlər və çəkiyə uyğun qiymətlər mövcud qaydalarla tənzimlənir.
Çörəyin keyfiyyətinə və çəkisinə dövlət tərəfindən nəzarətin həyata keçirilməsinə baxmayaraq, yerli sahibkarlar bundan yayına bilirlər.
Azərbaycanın şimal-qərb bölgəsində yerləşən Şəki Bakıdan 352 km məsafədədir.
Fevralın 2-nə olan rəsmi məzənnə 0,8073 AZN/USD təşkil edib.
Məqalə müəllifi ilə əlaqə ünvanı- [email protected]