Azərbaycan, Bakı, 21 aprel / Trend , müxbir N.İsmayılova /
"Son üç il ərzində Azərbaycandakı lizinq sektoru 67 milyon dollar artıb", - çərşənbə axşamı Azərbaycanda lizinqin inkişafı üzrə Beynəlxalq Maliyyə Korporasiyasının layihə meneceri Anastasiya Marina Bakıda keçirilən, ölkədə lizinqin hazırkı durumu və inkişaf perspektivlərinə həsr olunmuş dəyirmi masa zamanı deyib.
Tədbirin keçirilməsində əsas məqsəd lizinqin gələcək təşviqi üçün bazardakı hazırkı durumun müzakirəsi, sektorun inkişafı üzrə təkliflərin təqdim edilməsi, daxili və xarici sərmayə qoyuluşlarına təkandır.
BMK-nın Azərbaycandakı nümayəndəliyinin rəhbəri Aliyə Əzimovanın sözlərinə görə, 2003-cü ildən etibarən korporasiya ölkədəki lizinqin inkişafına altı milyon dollar sərmayə qoyub, İsveçrənin iqtisadi məsələlər üzrə dövlət katibliyi (Seco) isə üç milyon dollar yönəldib.
"Bu gün Azərbaycanın Lizinq Şirkətləri Assosasiyasında təmsil olunan 19 şirkətin ümumi lizinq portfelinin həcmi 208 milyon dollar təşkil edir ki, 2003-cü ildə bu rəqəm cəmi bir milyon dollara bərabər idi. Bu da portfelin 200 dəfədən çox artımı deməkdir", - Assosiasiyanın başçısı Elçin Əhmədov deyib. Bu lizinq əməliyyatlarının əsas hissəsi ölkənin tikinti və nəqliyyat sektorlarına aidir. Onun sözlərinə görə, ölkənin ÜDM-də lizinqin payı 0,43 faiz təşkil edib.
Məqalə müəllifi ilə əlaqə ünvanı: [email protected]