Azərbaycan, Bakı, 30 iyun / Trend , müxbir İ.Xəlilova /
"Başak İnam" müştərək sığorta müəssisəsinin səhmdarları nizamnamə kapitalının iki milyon manatadək artırılması barədə qərar qəbul ediblər və yaxın zamanlarda qərar həyata keçiriləcək. Bu barədə sığorta şirkətinin baş direktoru Orxan Həsənov bildirib.
"Biz Maliyyə Nazirliyinin sığorta şirkətlərinin kapitalı üçün tələb etdiyi minimal məbləği təmin etmək niyyətindəyik və şirkətin kapitalı 2010-cu ilə qədər iki milyon manat, 2011-ci ilə qədər isə 3,5 milyon manat təşkil edəcək", - Həsənov bildirib.
Onun sözlərinə görə, şirkət mərhələli şəkildə maliyyələşməyi planlaşdırır və mövcud qərar şirkətin Direktorlar Şurası və səhmdarlardan asılıdır.
"Sığorta haqqında" qanuna əsasən biz bəzi struktur dəyişikliyi etmişik və mülkiyyət formasının dəyişdirilərək açıq səhmdar cəmiyyətə çevrilməsi ilə bağlı Direktorlar Şurası və Reviziya komissiyası yaradılıb", - Həsənov bildirib.
"Başak İnam" şirkətinin nəzarət səhmlərinin paketi Azərbaycan tərəfinə məxsus olması səbəbindən Direktorlar Şurasına Azərbaycan vətəndaşı Akif Kərimov rəhbərlik edir. Şuranın tərkibində, həmçinin Türkiyə və Fransanın nümayəndəsi təmsil olunub. Reviziya komissiyasının nümayəndəsi Türkiyə vətəndaşı Levent Özal, onun iki köməkçisi isə Azərbaycan vətəndaşlarıdır.
"Başak İnam" 1996-cı ildə təsis olunub. Onun kapitalının 49 faizi Türkiyə sığorta şirkəti "Başak"a məxsusdur. "Basak İnam" müştərək müəssisədir və onun səhmdarları arasında Fransanın investisiya korporasiyası "Groupama" da var. 2006-cı ildə korporasiya Türkiyə sığorta şirkəti "Başak"-ın kapitalında 60 faiz paya sahib olaraq şirkətin səhmdarı olub.
İyunun 30-na olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]