Azərbaycan, Bakı, 10 avqust / Trend , müxbir N.İsmayılova /
Bazar ertəsi Bakıda Azərbaycan-Latviya biznes-forumu çərçivəsində maliyyə sektoru üzrə "dəyrimi masa" keçirilib. "Dəyrimi masa"nın əsas məqsədi Latviya və Azərbaycanın maliyyə sektorları arasında əməkdaşlıq perspektivlərini müzakirə etmək olub. Bu barədə bazar ertəsi Azərbaycan İnvestisiya Şirkətinin (AİŞ) icraçı direktoru Əfqan İsayev deyib.
"Azərbaycan üçün hazırda daha əhəmiyyətli olan qeyri-neft sektorunun inkişafıdır. Buna görə də AİŞ həm yeni, həm də mövcud layihələri sərmayələşdirmək həvəsində olan Latviya sahibkarlarına dəstək verməyə hazırdır", - İsayev deyib.
İsayevin sözlərinə görə, kapital qoyuluşu üçün daha çox perspektivli sahə hazırda ölkədə yüksək templə inkişaf edən kənd təsərrüfatıdır. Dövlət bu sektorda işləmək arzusunda olan potensial investorlara yardım göstərməyə hazırdır.
Xəzər Beynəlxalq İnvestisiya Şirkətinin (CIIC) icraçı direktoru Toğrul Köçərlinin sözlərinə görə, CIIC-də Azərbaycan iqtisadiyyatına sərmayə qoymaq niyyətində olan Latviya şirkətlərinə yardım görstərməyə hazırdır.
"Düşünürəm ki, nümayəndə heyəti yalnız bank sahəsi deyil, qida sənayesi, xidmət sahələri, informasiya texnologiyaları sahəsində də iş qurmaq niyyətindədir. Onlar öz bilikləri və Avropa təcrübələri ilə gəlmək niyyətindədirlər", - Latviya İnvestisiya və İnkişaf Agentliyinin baş direktoru Andris Ozols deyib.
Onun sözlərinə əsasn, biznes-forumun yekununa görə, Latviya sahibkarlarının Azərbaycana investisiya qoymasının axınını gözləmək olar.
"Latviya Prezidentinin Azərbaycana əvvəlki səfərinin yekununa görə, dörd il əvvəl yeni birgə şirkət yaradılıb və qarşılıqlı əməkdaşlıq şəraitində investisiya yatırımları, ticarət əməliyyatları həyata keçirilir", - Ozols deyib.
Biznes-forum Latviya Prezidenti Valdis Zatlersin Azərbaycana rəsmi səfəri çərçivəsində həyata keçirilir.
Tədbirin təşkilatçıları Azərbaycan İqtisadi İnkişaf Nazirliyi, Azərbaycan İxrac və İnvestisiyaların Təşviqi Fondu (AZPROMO) və Latviyanın Azərbaycandakı səfirliyidir.
Latviya nümayəndə heyətinin tərkibinə azərbaycanlı həmkarları ilə əməkdaşlığın inkişaf imkanlarını müzakirə etmək niyyətində olan hökumət və Latviya biznesmenlər qrupunun üzvləri daxildir. Biznes-forumda ümumilikdə 100-ə yaxın Azərbaycan və Latviya sahibkarları iştirak ediblər.
Məqalə müəllifi ilə əlaqə ünvanı: [email protected]