Azərbaycan, Bakı, 15 avqust / Trend , müxbir E.İsmayılov/
Azərsun Holding 2009-cu ilin sonu, 2010-cu ilin əvvəlində Bakı yaxınlığındakı Masazır qəsəbəsində yodlaşdırılmış və saflaşdırılmış xörək duzu istehsal edəcək yeni zavodu istifadəyə verməyi planlaşdırır. Bu barədə şənbə günü holdinqdən məlumat verilib.
"Dünya maliyyə böhranının davam etməsinə baxmayaraq, şirkət layihələrini dayandırmayıb. Artıq bu ilin dekabrında, ya da gələn ilin yanvarında duz istehsalı üzrə zavodu istifadəyə verməyi planlaşdırır", - mənbə deyib.
Bir müddət əvvəl zavodun 2009-cu ilin üçüncü rübündə açılacağı gözlənilirdi.
Mənbə deyib ki, bu layihənin realizəsinə planlaşdırılmış investisiyanın həcmi dəyişməyib və təxminən 12 milyon dollar təşkil edir. "Hansısa dəyişiklik olarsa, cüzi olacaq",- o deyib.
Zavodun inşası üçün yeddi hektarlıq ərazi Azərsun Holding-in təsis etdiyi "Azərbaycan duzu" İstehsalat Birliyi" QSC-yə və Azərbaycan İnvestisiya Şirkətinə (AİŞ) verilib. AİŞ layihəyə 2,9 milyon dollar vəsait qoymaq niyyətindədir və şirkət "Azərbaycan duzu" İB-nin nizamnamə kapitalında 25 faizlik iştirak əldə edəcək.
İsveçrənin Evoterm şirkəti artıq respublikaya zavodun inşası üçün gərəkli ləvazimatları verib. Tikinti işlərini Türkiyənin İnova şirkəti həyata keçirir.
Zavod Masazır gölünün yaxınlığında tikilir. Bu ərazidə göldən duz yığımı üçün zavod və infrastruktur (nasoslar və s.) yerləşəcək. İlkin olaraq duz Masazir gölünün ərazisindən toplanacaq. Gələcəkdə isə Türkmənistandan tədarük nəzərdə tutulub.
Türkmənistandan tədarük zavodun inşasından azı il yarım sonra başlaya bilər. Hələlik zavod yerli duz əsasında işləyəcək. Bu barədə bir müddət əvvəl AİŞ-dən deyilib.
Yodlaşdırılmış duza böyük tələbatla əlaqədar olaraq, hətta istehsal xəttinin iki dəfə artırılması - sutkada 200 tona çatdırılması qərara alınıb. Əvvəllər 30 min tonluq illik istehsalla gündə 100 ton yodlaşdırılmış xörək duzu istehsal etmək planlaşdırılmışdı.
Müəssisədə yüksək keyfiyyətli xörək duzu ilə yanaşı tibbi duzların istesalını təşkil etmək də planlaşdırılır.
Yod çatışmazlığı probleminin aktuallığını UNİCEF-in donor yardımı ilə həyata keçirilən "Yod çatışmazlığı problemi və universal duzun yodlaşdırılması" layihəsinin nəticələri də göstərib.
Məqalə müəllifi ilə əlaqə ünvanı: [email protected]