Azərbaycan, Bakı, 03 sentyabr / Trend , müxbir N.İsmayılova /
Azərbaycan Mərkəzi Bankı (AMB) ölkə iqtisadiyyatında deflyasiya proseslərinin və postböhran faktorlarının aradan qaldırılması üzrə tədbirlər keçirir. Bu barədə cümə axşamı Mərkəzi Bankın İdarə Heyətinin sədri Elman Rüstəmov deyib.
"AMB-nin əsas tapşırıqlarından biri bütün neqativ postböhran faktorlarının aradan qaldırılmasıdır. Mərkəzi Bank ölkənin real sektoruna mənfi təsir göstərən deflyasiya prosesindən də çox narahatdır, - Rüstəmov deyib. - Lakin son aylarda qiymətlərin səviyyəsinin tədricən qalxması müşahidə olunur və sentyabrda bu tendensiyanın davam edəcəyi gözlənilir".
Onun sözlərinə görə, 2009-cu ildə ölkənin Mərkəzi Bankı kommersiya banklarına xarici öhdəçiliyin icrasında dəstək üçün 130 milyon dollar ayırıb. Bu da ÜDM-in yalnız 0,2 faizini təşkil edir.
"Sözügedən faktor ölkənin bank sektorunun sabitliyini təsdiq edir və bu gün bütün banklar vaxtında öhdəçiliklərini icra edirlər", - Rüstəmov deyib.
Dünya maliyyə böhranı başlayandan Azərbaycan bankları xarici borclar üzrə 1,9 milyard dollar məbləğində ödəmələr ediblər. "Dünya maliyyə bazarının canlanmasını nəzərə alaraq Azərbaycan bankları 400 milıyon manat cəlb ediblər", - Rüstəmov deyib.
Onun sözlərinə görə, bu gün bank atkivləri üzrə gəlirlilik 2,9 faiz təşkil edir. Ölkədə kreditləşmə həcminin artımı müşahidə edilir və pul kütlələrinin artımı 10-15 faiz təşkil edir.
"Ümumiyyətlə, bankların kredit portfelində vaxtı ötmüş kreditlərin payı təxminən 3,6 faiz təşkil edir, kapitalın adekvatlığı isə 12 faizlik normativ tələbə qarşı 19 faizə bərabərdir", - o deyib.
Mərkəzi Bank cari ildə ölkə iqtisadiyyatında 2 milyard dollarlıq likvidlik dəstəyi göstərib. Bundan 750 milyon dolları dövlət zəmanəti ilə uzunmüddətli əsaslarla ölkənin Dövlət Neft Şirkətinə verilib.
Rüstəmovun sözlərinə görə, Azərbaycanda iqtisadi artım davam edir. Artım hesabat dövrü ərzində 2,7 faiz, qeyri-neft sektorunda 3,6 faiz, neft sektorunda isə 2,3 faiz təşkil edib.
"Mərkəzi Bankın ən mühüm tapşırıqlarından biri milli valyutanın sabit kursunun saxlanılmasıdır. Valyutamız sabitdir və ölkənin rəqabətə davamlılığına mənfi təsir göstərməyib", - AMB rəhbəri deyib.
Məqalə müəllifi ilə əlaqə ünvanı: [email protected]
